Það hvílir einhver ævintýrablær yfir nafninu Túle.  Dagbækur Knud Rasmussen, Peary, Hendersons, Malaurie og margra annarra landkönnuða segja frá ævintýraferðum á þessum norðurhjara og flest, sem þeir geta um, er óbreytt.  Íbúarnir á þessum slóðum lifa enn þá af veiðum (selir, hvítabirnir, fuglar, náhveli og rostungar).  Þarna eru sex þorp, hið stærsta hefur u.þ.b. 600 íbúa.  Nyrzt er Siorapaluk, sem er jafnframt nyrzta byggða ból heimsins.  Þeir, sem hafa séð dönsku kvikmyndina „Smilla’s Sense of Snow”, kannast við þetta nafn.

Veiðiferðirnar taka oft margar vikur.  Nú gilda strangar reglur um veiðarnar, s.s. hve mörg dýr má fella og hvar.  Náhveli má aðeins veiða með skutlum.  Bjarnarskinnsbuxur og kamikkur eru hlýjasti búnaðurinn í löngum sleðaferðum.  Meðalhiti í febrúar og marz er u.þ.b. –30°C.  Norður-Ameríka er steinsnar frá Norður-Grænlandi og þar hafa leiðir inúíta legið í þúsundir ára og síðustu flutningar fólks þaðan til Grænlands fóru fram í kringum 1870.  Reynsla kynslóðanna á þessum harðbýlu slóðum hefur gengið í erfðir og aðlögunarhæfileikar íbúanna hafa haldið lífi í þessum litlu samfélögum.  Þegar ísa leysir í ágúst eru stórir, opnir bátar með öflugum velum dregnir fram til ferðalaga og veiðiferða.  Á þessum tíma er bjart allan sólarhringinn, allt til ágústloka.  Veiðin er nýtt til fullnustu, skinning í föt og kajaka, kjötið og innyflin eru borðuð og étin, horn náhvala og tennur rostunga eru notaðar til útskurðar, skartgripagerðar og veiðitækja og jafnvel fjaðrir eru notaðar í listsköpun heimilanna.

Qaanaaqþorpið varð til á sjötta áratugnum, þegar bandaríski herflugvöllurinn, sem var upprunalega byggður í kalda stríðinu við Túle/Dundas, var stækkaður.  Þá var ekki talið við hæfi, að almennir borgarar byggju svo nálægt herstöðinni.  Það varð til þess, að fólkið var flutt 100 km norðar, þar sem Qaanaaq var byggt 1953.  Tilvist herstöðvarinnar, Pituffik, eins og Grænlendingar kalla hana, gerir ferðir til Qaanaaq erfiðar.  Ferðamenn verða að fá ferðaleyfi þangað frá danska utanríkisráðuneytinu.  Áætlanir eru uppi um byggingu flugbrautar nærri Qaanaaq, þannig að beint flugsamband kemst á milli þorpanna í Norður-Grænlandi.  Það er lítið hotel í Qaanaaq og gönguferð þaðan upp að jökli tekur ekki nema klukkutíma.