Ouagadougou er höfuðborg og stærst borga Burkina Faso (fyrrum Efri-Volta).  Hún var höfuðborg konungsríkis Mossifólksins, Wagadugu, sem var stofnuð á 15. öld (setur morho naba = kóngsins mikla).  Islam hélt innreið sína á dögum konungsins Maba Dulugu (1796?-1825).  Kóngurinn mikli býr enn þá í borginni, þótt vald hans hafi rýrnað mikið síðan á nýlendutíma Frakka og eftir að landið fékk sjálfstæði.  Ouagadougou er borg stórra trjáa og nútímabygginga en umkringd hefðbundnum íbúðahverfum.  Þar er markaður, handverksmiðstöð, Þjóðminjasafn og Borgarháskólinn (1969).  Borgin er tengd hafnarborginni Abidjan á Fílabeinsströndinni með járnbraut og skammt utan hennar er millilandaflugvöllur.  Helztu framleiðsluvörur borgarinnar eru gosdrykkir, eldspýtur og skófatnaður.  Áætlaður íbúafjöldi árið 1985 var tæplega 360 þúsund.