Flóra og fána.  Hin náttúrulega skógarflóra er næstum horfin og finnst nær eingöngu hátt uppi í fjallahlíðum.  Uppi á hásléttunum eru skógaleifar á hæstu steppusvæðunum.  Veiðiþjófnaður hefur valdið miklum óskunda og minnkandi dýrastofnum.  Fílastofninn er næstum horfinn og eftir eru vatnabuffalar, vörtusvín, babúnar og antelóputegundir.

Loftslagið.  Hæð landsins yfir sjó hefur veruleg áhrif á loftslagið og dregur úr einkennum hitabeltisins.  Það er fremur svalandi uppi á hásléttunni, 21°C að meðaltali árið um kring á daginn og fer niður í 15°C um nætur.  Lægra yfir sjó er hitastigið aðeins litlu hærra, t.d. í Bujumbura í Imbo-dalnum.  Árleg meðalúrkoma er á bilinu 1500-1800 mm á hæstu svæðum en aðeins 1000 mm við Tanganyika-vatnið.  Þurrasti tíminn er frá maí til ágúst en ella dreifist úrkoman nokkuð jafnt yfir árið.