Abu Gurob er í Mið-Egyptalandi á Gizasvæðinu.

Sólarmusterið er 12 km sunnan Giza og 1,5 km norðvestan pýramídanna í Abusir.  Frá Giza tekur 1½ tíma að ríða þangað á asna, drómedara eða hesti.  Komi maður í bíl, þarf að ganga í u.þ.b. 20 mínútur.  Abu Gurob er velvarðveittar rústir af sólarhofi faraósins Niuserre (5.ætt), sem hann lét reisa til að minnast 30 ára valdaferils síns.  Abu Gurob er við jaðar eyðimerkurinnar.

Talið er að 5. höfðingjaættin (2465-2323) hafi látið reisa 6 hof til dýrðar sólguðnum Re en þá var hann í hávegum hafður og konungarnir voru synir hans.  Skammt suðaustan Abu Gurob er annað hof, User, sem talið er vera endurgerð af hinu horfna, stóra sólhofi í Heliopolis.

Árin 1898-1901 stóð safnið í Berlín fyrir fornleifauppgreftri þar.  Ýmsir munir fundust en lágmyndir hofsins þóttu bera af og prýða nú söfnin í Berlín og Kaíró.  Gerð hofa 5. ættarinnar var ævinlega eins:  Dalhof með göngum upp í heiðurshofið og alltaf við jaðar eyðimerkurinnar.  Þau voru guðshús en ekki grafhýsi þeirra, sem létu reisa þau.  Sameiginlegt með þeim var opinn garður umhverfis sólareinsteinunginn.  Hann var miðja tilbeiðslunnar, sem fyrsti punktur hinnar rísandi sólar og framan við hann var altari, þar sem færðar voru fórnir.

Userkaf var forfaðir 5. ættar.  Árin 1954-57 grófu svissneskir og þýzkir fornleifafræðingar hofið upp.  Það er minna en Abu Gurob og í verra ástandi.  Hluti veggja þess er frá dögum Ramses II.  Þar fannst svart höfuð af gyðjunni Neith, sem nú er varðveitt í safninu í Kaíró.
Mynd:  Niuserre-hofið.