Kaíró er í 20 m hæð yfir sjávarmáli.  Íbúafjöldinn er 8 milljónir í borginni sjálfri en nálægt 16 milljónum í Stór-Kaíró.  Höfuðborg landsins heitir El-Kahira eða Misr el-Kahira á arabísku.  Hún er stærsta borg meginlands Afríku og er nefnd 'Hlið Austurlanda' milli hins kristna heims og hins islamska.  Miðja borgarinnar er á hægri bakka Nílar, 20 km sunnan kvíslasvæðis óshólmanna, þar sem áin kvíslast í Damiettu og Rosettu.

Austan Kaíró rísa rauðleitar auðnir Mokatfjalla og handan þeirra er Arabíska eyðimörkin.  Til suðurs nær borgin allt að úthverfinu Maadi.  Til vesturs teygist hún yfir ána með nýjum hverfum inn í Lýbísku eyðimörkina.  Í Kaíró situr ríkisstjórn landsins, þingið og aðrar æðstu valdastofnanir.  Þar er aðsetur æðstu stofnana islams og kristinnar kirkju (kopta).  Nokkrir háskólar og tækniskólar eru í borginni.

Snemma á fornöld stóð borgin 'Chere-ohe' (Bardagaslóð) á austurbakka fljótsins á Pýramídahæð.  Þar áttu Horus og Seth að hafa barizt.  Grikkir kölluðu borgina Babýlon og Rómverjar einnig síðar en þeir víggirtu hana.  Eftir að kalífarnir lögðu hana undir sig árið 641 e.Kr. byggðist hin nýja höfuðborg, Fustat, norðan virkisins á sléttunni.  Arabar nefndu hana eins og landið Misr el-Fustat eða bara Misr.

Árið 750 brann borgin til grunna í árás Ómana.  Stóra moskan stóð ein eftir.  Árið 969 lagði Gohar hershöfðingi Egyptaland undir sig og kom upp herbúðum norðan El-Katai, þar sem hét síðan Misr el-Kahira (borg hins sigursæla Marz).  Saladin byggði síðan (á 12.öld) sameiginlega múra umhverfis Fustat og Kahira.  Því verki var þó aldrei lokið að fullu.  Hann hóf byggingu virkis.  Undir stjórn falimida varð Kaíró að glæsiborg og lifði blómaskeið sitt á 14.öld, þótt borgarbúar mættu glíma við pestir, uppreisnir, andóf og ofsóknir kristinna manna.  Eftir orrustuna við Heliopolis árið 1517 hélt ósmanasoldáninn Selim I inn í Kaíró.  Þrátt fyrir rán og gripdeildir og kúgun Tyrkja, hélt Kaíró velli sem lifandi menningarborg.

Napóleon Bonaparte gerði Kaíró að aðalaðsetri sínu árin 1798-99 á meðan herför hans stóð yfir.  Árið 1805 lagði Muhammed Ali, sem æðsti valdhafi landsins, virkið (zitadella) undir sig og lét fjarlægja 480 léttar fallbyssur þaðan.  Síðan hefur Kaíró vaxið og dafnað, einkum eftir opnun Súezskurðarins.  Nú býður borgin upp á andstæður hins gamla arabíska hluta og nýrri hverfa að evrópskri fyrirmynd.  Bygging neðanjarðarbrautar hófst 1981.

Þegar farið er á bazar, þarf að gæta sín að láta ekki plata sig með of háum verðum.  Það þarf að prútta.  Prúttið getur gengið svo lengi sem við áttum okkur á mismunandi lífsskilyrðum í eigin landi og því landi, sem við heimsækjum.  Egypzkir sölumenn eru mjög ágengir og það þarf að sýna þeim fulla hörku, ef fólk óskar ekki að eiga við þá viðskipti.