Addis Ababa, höfuðstaður og stærsta borg Eþíópíu, er á vatnsríkri hásléttu, sem er umkringd fjöllum í miðju landsins.  Hún hefur verið höfuðborg landsins síðan síðla á 19. öld, þegar hún tók við hlutverki Entoto.  Fyrrum höfuðborg landsins er enn hærra yfir sjó og þar er kalt og skortur á eldiviði.  Keisaraynjan Taitu, eiginkona Menileks II (1889-1913) fékk keisarann til að byggja bústað við hverina við rætur hásléttu Entoto og úthluta aðlinum landi á þessu svæði.  Á þennan hátt var borgin stofnuð árið 1887 og keisaraynjan gaf henni nafnið Addis Ababa, sem þýðir Nýja blómið. 

Fyrstu árin var borgin í rauninni stór herstöð.  Miðdepill hennar var keisarahöllin, sem var umkringd herskálum og bústöðum aðalsins.  Eldiviðarskorts fór að gæta, þegar íbúunum fjölgaði.  Árið 1905 var mikill fjöldi tröllatrjáa fluttur inn frá Ástralíu.  Þau dreifðu sér náttúrulega og veittu borginni skjól og nægan eldivið.

Addis Ababa var höfuðborg Austur-Afríku á árunum 1935-41.  Nútímasteinhús voru reist á þessum tíma, einkum þar sem Evrópumenn bjuggu, og slitlag var lagt á fjölda vega.  Aðrar umbætur fólust meðal annars í vatnsveitunni við Gerarsa vestan borgarinnar og vatnsorkuverinu við Akaki sunnan hennar.  Litlar breytingar urðu á borginni á árunum 1941-60 en sínan hafa framfarir verið stórstígar.  Borgin er miðstöð menntunar og stjórnsýslu í landinu.  Borgarháskólinn var stofnaður 1950 og honum tengist safn eþíópískra fræða.  Þarna eru nokkrir kennara- og tækniskólar og tónlistarskóli auk Þjóðskjalasafns og Þjóðarbókhlöðu, halla fyrri keisara og stjórnarráð landsins.  Nokkur alþjóðleg fyrirtæki og stofnanir eiga aðalstöðvar sínar í borginni, s.s. Afríkubandalagið og Efnahasstofnun Sameinuðu þjóðanna fyrir Afríku, sem eru í Afríkuhöllinni.

Meðal þess, sem framleitt er í borginni, eru skór, vefnaðarvörur, matvæli, drykkjarvörur, trévara, plastvörur og efnavörur.  Flest þjónustufyrirtæki landsins eru líka í borginni (bankar, tryggingafélög) og stærstu dagblöð landsins eru gefin út þar.

Mestur hluti útflutnings landsmanna fer um Addis Ababa á leið sinni til hafnarborganna Djibouti við Adenflóa og Asseb í Eritreu við Rauðahaf.  Borgin er einnig miðstöð viðskipta innanlands.  Markaður hennar (Mercado) í vesturhlutanum er einhver hinn stærsti sinnar tegundar í Afríku.  Miðborgartorgið (Piazza) er umkringt mörgum nútímalegum verzlunarmiðstöðvum með evrópsku yfirbragði.  Borgin er miðstöð samgangna í landinu.  Hún er í vegasambandi við aðrar helztu borgir landsins og járnbrautasambandi við Djibouti.  Millilandaflugvöllur er skammt utan borgarinnar.

Fátt er um almenningsgarða og afþreyingarsvæði í borginni en samt er nóg af opnum svæðum, sem væri hægt að nýta til slíks brúks.  Lítill dýragarður er í almenningsgarði í grennd við háskólann og vatnasvæðið skammt sunnan borgarinnar býður upp á siglingar, vatnaskíði, böð og fuglaskoðun.  Vinsælasta áhorfendaíþróttin er knattspyrna og körfubolti, hnit og aðrar íþróttir eru stundaðar.  Áætlaður íbúafjöldi árið 1994 var rúmlega 2,3 miljónir.