Gonder er borg í norðvesturhluta Eþíópíu á blágrýtishrygg í 2300 m hæð yfir sjó.  Undan hryggum spretta ár og lækir, sem streyma til Tana-vatnsin 34 km sunnan borgarinnar.  Gonder var höfuðborg Eþíópíu á árunum 1632-1855 og þar eru rústir kastala og höll frá tímum ýmissa keisara þessa tímabils innan borgarmúra.  Kastali Fasilides og höll Iyasu mikla (1682-1706) eru merkastar þessara bygginga.  Byggingarstíll þeirra sýnir portúgölsk áhrif og ber einnig merki frá höllum Aksum-keisaratímanum og moskum Suður-Arabíu.  Talið er, að 44 kirkjur hafi staðið í borginni á 18. öld en aðeins fáar eru eftir, þótt borgin sé enn þá eitt höfuðvígja Eþíópísku rétttrúnaðarkirkjunnar.  Fagurlega skreytt Debre Berhan Selassie-kirkjan er enn þá í notkun.  Borgin varð illa úti í borgarastríðunum á árunum 1750-1890 en eftir að Bretar náðu undirtökunum í Súdan 1899 hófust viðskipti við Bláu-Nílarsvæðið á ný.  Flestir íbúanna eru kristnir.

Flestir bændur umhverfis borgina stunda sjálfsþurftarbúskap.  Samt sem áður er borgin miðstöð viðskipta með kornvöru, olíufræ og nautgripi.  Helztu framleiðsluvörur Gonder eru vefnaðarvörur, skartgripir, kopar- og leðurvörur.  Borgin er mikilvæg samgöngumiðstöð í þjóðvegakerfinu og hefur eigin flugvöll.  Þarna er háskólasjúkrahús, sem annast m.a. þjálfun starfsfólks í heilsugæzlustöðvum í sveitunum umhverfis.  Áætlaður íbúafjöldi 1994 var tæplega 167 þúsund.