Nigerfljótið er í Vestur-Afríku.  Það á upptök sín í Gíneu og rennur 4180 km gegnum Malí, Niger og Nígeríu út í Gíneuflóa.  Aðalþveráin er Benue, sem sameinast Nigerfljóti við Lokoja í Nígeríu.  Ósar Nigerfljótsins eru 36.300 km², hinir stærstu í Afríku með 190 km langri strandlengju.  Port Harcourt er í ósunum.  Inni í miðju Malí myndar fljótið einnig stórt fenjasvæði.  Fljótið er skipgengt næstum allt árið alla leið til Lokoja.  Um regntímann má komast lengra á skipum og bátum.  Fljótið og þverár þess ná yfir 463.000 km².  Úrkoman er mjög mismunandi á þessu stóra svæði, allt frá 254 mm í Timbuktu til 4064 mm á ósasvæðinu á ári.  Meðalrennsli fljótsins í ósunum er 6000 rúmmetrar á sekúndu.

Við Efra-Nigerfljót voru fornríkin Malí og Songhai.  Þá var Timbuktu við Stórubugðu aðalmenningar- og verzlunarborg þessa landshluta.  Vestrænir landfræðingar eyddu miklum tíma til rannsókna á farvegi fljótsins.  Skozki landkönnuðurinn Mungo Park komst að því árið 1796, að fljótið rann til austurs og árið 1830 staðfestu ensku bræðurnir Richard og John Lander, að það rynni út í Gíneuflóa.