Yaoundé, höfuðstaður Kamerún, er á hæðóttri og skógi vaxinni sléttu milli ánna Nyong og Sanaga í miðsuðurhluta landsins.  Hún var stofnuð 1888, þegar landið var þýzkt verndarsvæði.  Árið 1915 var borgin hersetin belgískum hersveitum og varð höfuðborg Frönsku-Kamerún 1922.  Á árunum 1940-46 tók Douala við höfuðborgarhlutverkinu, en þegar sjálfstæði var fengið 1960, varð hún aftur höfuðborg 1961 og árið 1972 alls lýðveldisins eftir sameiningu.

Borgin hefur vaxið sem stjórnsýslu-, viðskipta- og samgöngumiðstöð (vegir, járnbrautir, flug).  Iðanaðurinn byggist aðallega á framleiðslu (vindlingar, bjór, borðviður, prentun).  Borgin er í einu frjósamasta landbúnaðarhéraði landsins og þar er stór markaður.  Háskóli borgarinnar var stofnaður 1962.  Þarna eru skólar á ýmsum sviðum (grunnskólar og á sviðum landbúnaðar, blaðamennsku, stjórnsýslu og alþjóðasamskipta).  Pasteur-stofnunin annast rannsóknir á sviðum líftækni og fleiri stofnanir á sviðum rannsókna eru í borginni.  Meðal áhugaverðra staða umhverfis borgina eru Næturgalafossar og fjöldi hella, sem eru nefndir eftir pytgmíum (Akok-Bekoe).  Áætlaður íbúafjöldi árið 1987 var rúmlega 712 þúsund.