Bukavu er höfuðstaður Kivu-héraðs á suðvesturströnd Kivu-vatns.  Hann er miðstöð samgangna á landbúnaðarsvæði (kaffi, sítrusávextir og grænmeti) og iðnaðar (lyf, skordýraeitur, ölgerðir, matvæli og prentun).  Þarna er kennaraskóli og ferðamannamiðstöð fyrir svæði við vatnið og þjóðgarða í nágrenninu.  Bukavu hét Costermansville, þegar Belgar réðu ríkjum, og tók við héraðsborgarhlutverkinu af Rutshuru árið 1920.  Borgin varð einnig miðstöð evrópskrar búsetu áður en landið fékk sjálfstæði árið 1960.  Um miðjan tíunda áratug 20. aldar voru þar einhverjar stærstu búðir Sameinuðu þjóðanna fyrir flóttamenn frá Rúanda, þar sem borgarastyrjöld geisaði.  Árið 1996 réðust uppreisnarhermenn á búðirnar af landi og úr lofti.  Áætlaður íbúafjöldi árið 1991 var tæplega 210 þúsund.