Monrovia, höfuðstaður Líberíu, er aðalhafnarborg landsins á Bushrodeyju og Mesuradoskaga.  Ameríska nýlendufélagið stofnaði hana á valdadögum James Monroe, Bandaríkjaforseta, og nefnd eftir honum.  Fyrsti bærinn (1822) var á Providence-eyju í mynni Mesuradoárinnar.  Íbúarnir eru afkomendur landnema frá Norður-Ameríku, sem komu flestir til landsins á árunum 1830-71, og talsverður fjöldi innflytjenda frá nágrannaríkjum.  Á Bushrodeyju er manngerð höfn og eina fríverzlunarsvæðið í Vestur-Afríku.  Borgin er aðalmiðstöð viðskipta og samgangna í landinu og hefur laðað að sér erlenda fjárfestingu í iðnaði, sem byggist á olíuvinnslu, túnfiskveiðum, lyfjagerð og sements- og málningarframleiðslu.

Meðal áhugaverðra bygginga eru þinghúsið (1958), Landstjórahúsið (1964), ráðhúsið og dómshúsið.  Margar þessara og annara bygginga urðu illa úti í grimmilegri borgarastyrjöld í upphafi tíunda áratugarins.  Monróvía er miðstöð menntunar með Líberíuháskóla, sem var stofnaður með lögum 1851, opnaður 1862 og fékk háskólanafn 1951.  Læknaskóli var stofnaður 1968.  Nokkrir kirkjuskólar starfa á framhaldsstigi og nútímaskólahverfi er í Sinkorhverfinu.  John F. Kennedy minningarsjúkrahúsið, ríkisspítali og tveir kirkjuspítalar starfa í borginni auk nokkurra einkarekinna.  Árið 1961 var haldin ráðstefna í borginni til eflingar einingu Afríkuríkja.  Áætlaður íbúafjöldi 1984 var rúmlega 421 þúsund.