Flóra og fána.  Meginlandshluti Miðbaugsgíneu er þakinn þéttum hitabeltisregnskógi, sem timburiðnaðurinn nýtir sér.  Rúmlega 140 tegundir tjráa vaxa á þessum slóðum og verðmætastar eru Aucoumea klaineana (okume), afrísk valhneta og ýmsar tegundir mahónítrjáa.  Ofnýting skóganna næst ströndinni beindi spænskum timburfyrirtækjum æ lengra inn í landið.  Skógrækt er lítt stunduð og annar gróður hefur vaxið í stað trjánna, sem voru felld.  Afrískir sjálfsþurftarbændur ryðja skóg og brenna land til að geta ræktað kassava, baunir, kartöflur, rætur og söluafurðir (kaffi og kakó) eins og mjög gropinn jarðvegurinn leyfir.  Fenjaskógar eru víða með ströndum fram og meðfram ám og vötnum.

Á Biokoeyju er hitabeltisflóran fjölskrúðug og miklir fenjaskógar.  Á hærra liggjandi svæðum eru grænmetisgarðar og beitilönd.

Meginlandsfánan er margbreytileg, górillur, simpansar, margar fágætar apategundir, hlébarðar, buffalar, antilópur, fílar, flóðhestar, krókódílar og fjöldi snákategunda (pýton).  Skordýrafjöldinn er mikill (tsetse, anófelesmýflugan, sem ber malaríu) og maurar, bjöllur, köngullær og termítar eru út um allt.  Á Biokoeyju eru engine stór dýr en þar er fjöldi apategunda, dvergantilópur og nagdýr auk mýflugna og annarra skordýra.