Flóra og fána.  Þétt skóglendi þekur miðnorðurinnlandið og Chimoio-hásléttuna en mestur hluti norð- og austurinnlandsins er þakin gisnari skógi.  Í suðurhlutanum breytist gisið skóglendi austurhlutans í runna og steppusvæði til vesturs.  Stærstu skógaleifarnar eru á Chimoio-hásléttunni, vestan og suðvestan Beira, og á norðurinnlandinu, sunnan Lúrio-árinnar, eru fjórir þjóðgarðar, Gogongosa, Zinave, Bazaruto og Banhine.

Meðal villtra dýra eru buffalar, fílar, vörtusvín, hlébarðar, bavíanar, gíraffar, sebrahestar, antilópur, ljón og fjöldi tegunda hófdýra og katta.  Krókódílar og flóðhestar finnast enn þá í lygnu straumvatni.  Snákar (pýton, adder, kóbra og viper) eru um land allt. Flamingóar, trönur, storkar, hegrar, pelikanar, íbísfuglar og fleiri tegundir vatna- og vaðfugla eru víðast hvar um landið en þó mest, þar sem votlendast er í norðausturhlutanum.  Hræfuglar eins og krákur, gammar og músafálkar sjást víða.  Einnig gíneufuglar, akurhænur, lynghænur og fjöldi tegunda gæsa og anda.  Dýraverndarsvæði og veiðisvæði eru aðallega í mið- og suðurhlutunum að Niassa-, við landamæri Tanzaníu og Gilé- verndarsvæðunum, suðvestan Nampula, undanskildum.  Stærstu verndarsvæðin eru rétt sunnan Zambezifljótsins í grennd við Chimoio-hálendið.  Fimm veiðisvæði landsins eru Niassa, Gilé, Marromeu, Pornene og Maputo.