Niamey, höfuðstaður landsins, stendur við Nígerána í suðvesturhorni þess.  Borgin óx upp úr landbúnaðarþorpi maouri-, zerma- og fulanifólksins og var lýst höfuðborg árið 1926.  Aðalvöxtur hennar hófst eftir síðari heimsstyrjöldina.  Nú býr þar fjöldi yoruba- og hausakaupmanna, athafnamanna, embættis- og iðnaðarmanna frá Nígeríu, Benín og Tógó auk innfæddra víða að.  Meginhluti borgarinnar er á norðurbakkanum en hefur þanizt út til suðurs eftir byggingu Kennedybrúarinnar 1970.  Þarna er rekinn lítils háttar iðnaður en flestir íbúanna stunda þjónustustörf.  Niamey-háskóli var stofnaður 1971 og fékk háskólaleyfi 1973.  Stjórnunarskóli ríkisins var stofnaður 1963.  Meðal mennta og menningastofnana eru Þjóðminjasafnið og stofnun, sem stundar rannsóknir á sviðum jarðfræði, námuvinnslu, mannfræði, þjóðfræði, skógabúskapar, hitabeltislandbúnaði og dýrafræði.  Utan borgar er millilandaflugvöllur og vegakerfið tengir Niamey við Atlantshafshafnir í Benín og Nígeríu.  Áætlaður íbúafjöldi 1988 var rúmlega 392 þúsund.