Landslag, loftslag
og gróðurfar er verulega mismunandi frá suðri til norðurs í landinu og
einnig samfélagið, menning og búskaparhættir. Efnahagsleg þróun er
lengst kominn í suðurhluta landsins. Skógarnir eru gjörnýttir, bæði frá
stórum plantekrum og smábýlum. Öll iðnvæðing, olíusvæði og hafnir
landsins eru þar. Þar eru stór menningarsvæði, yorubafólkið í vestri,
edofólkið í miðhlutanum og ibgo-ibibiomenn í austri.
Miðhluti landsins
er strjálbýlastur og minnst þróaður. Hann nær yfir u.þ.b. 40%
heildarflatarmálsins en aðeins 20% íbúaanna búa þar. Þeir eru af
rúmlega 180 tungumálahópum. Fyrir 1970 voru uppi miklar áætlanir um
þróun þessa landshluta en aðeins lítill hluti þeirra komst á koppinn (Kainji-stíflan
og Bacita-sykurverkefnið auk nokkurs iðnaðar í borgunum Jos og Kaduna).
Eftir stjórnsýslulega endurskipulagningu 1975 varð miðhlutinn veigameiri
vegna þess að sjö hinna 19 fylkishöfuðborga (nú 36) og höfuðborgarfylki
landsins (7250 km²) eru þar. Snemma á 9. áratugnum var byggt risajárn-
og stálver í Ajaokuta í grennd við Lokoja.
Framundir upphaf 20. aldar, þegar nýir straumar í efnahagsmálum fóru um
landið vegna lagningar járnbrauta milli hafnarborganna, var haldið uppi
reglulegum ferðum yfir Sahara frá norðurhlutanum (Nígeríska-Súdan) til
landa við Miðjarðarhaf og Miðausturlanda. Menning hausa- og fulanimanna
hefur ríkt í Nígeríska-Súdan nema í lægð Chadvatnsins, þar sem
kanurimenn stofnuðu ríkið Borno. Fulanimenn eru hirðingjar, sem færa
sig til með hjarðir sínar, en hausafólkið stundar ræktun en báðir
þjóðflokkar aðhyllast að mestu islam.
Hlutar landsins, sem igbofólkið byggir, eru þéttbýlustu svæði Afríku
sunnan Sahara. Land yorubamanna, sem rækta kakóbaunir, eru líka þéttbýl
en laða til sín aðkomufólk frá löndum igbo- og Ibibio-manna, sem eru
ofbyggð. Nyrzt í landinu eru tvö mjög þéttbýl svæði við Sokoto- og
Kano-Katsina. Þéttbýlið við Kano byggist á mikilli ræktun en
þéttbýlissvæðin umhverfis Sokoto og Katsina eru ófrjósöm og framfleyta
ekki íbúunum.
Þéttbýliskjarnar eru víðar, s.s. við tinnámurnar á Jos-hásléttunni og á
Okene-svæðinu. Mestur hluti landsins er engu að síður strjálbýll og
stór svæði á miðbeltinu, í lægð Chadvatnsins og á Austur-Krossársvæðinu
eru næstum óbyggð.
Rúmlega helmingur landsmanna býr í sveitunum. Þéttbýliskjarnar eru
meðfram ströndinni, á Yorubasvæðinu í suðvesturhlutanum og á svæðum
hausa- og kanurimanna allranyrzt. Hlutar igbo- og anang-ibibiosvæðanna
í suðausturhlutanum og Tiv-svæðið í miðbeltinu eru strjálbýlir með
smáþorpum, þar sem stórfjölskyldur búa. Nokkur slík þorp mynda sums
staðar bæjarfélög folks, sem er meira og minna skylt innbyrðis og
upprunalegum stofnendum þorpanna.
Í austurfylkjum landsins er höfðingi í hverju þorpi, oftast einhver
öldunganna og efnamanna þess, sem stjórnar með samþykki íbúanna. Á
svæðum yorubamanna, Benínsvæðinu og norðurríkjunum eru höfðingjarnir
kosnir með samþykki héraðsstjórnanna. Eitt einkenna þorpslífsins er
aldursgreiningin og jafnaldrar eru látnir halda hópinn. Fyrrum voru
drengir látnir halda hópinn í þrjú ár sem vinnuhópar og til undirbúnings
manndómsvígslu.
Húsagerð er mismunandi eftir landshlutum. Í strandhéruðunum er
raffíapálminn aðalbyggingarefnið enda mikið af honum á þeim slóðum.
Ferhyrndir leirkofar með strámottuþökum eru algengir á skógabeltinu en
hinir betur megandi nota bárujárn á þökin. Á steppunum í miðbeltinu og
sums staðar norðanlands eru byggðir leirkofar með hallandi stráþökum en
flöt leirþök eru notuð á þurrustu svæðunum nyrzt.
Áður en 20. öldin
gekk í garð voru yoruba-, hausa-, edo- og kanurimenn auk íbúa
strandhéraðanna einu borgarbúar landsins. Yorubamenn hafa lengstu
þéttbýlissögu þjóðflokka Afríku að baki. Borgir þeirra, margar
aldagamlar, voru upprunalega stjórnsýslu- og verzlunarmiðstöðvar.
Næstum helmingur yorubamanna býr í bæjum eða borgum með fleiri en 5000
íbúa (Ibadan, Ogbomosho, Abeoukuta, Ife og Oyo). Benínborg, líkt og
Ibadan og Oyo, er höfuðborg stjórnmála og menningar. Saga hennar hófst
fyrir mörgum öldum, þegar hún var höfuðborg konungsríkisins Benín.
Borgirnar Bonny, Opobo, Okrika, Buguma, Brass, Forcados, Creek og
Calabar uxu upp úr fiski- og saltvinnsluþorpum, þegar verzlun jókst
milli strandbúa og Evrópumanna. Þrælasalan var aðalhvatinn í upphafi en
svo tók verzlun með landbúnaðarafurðir við. Í upphafi nýlendutímans
voru þessar hafnarborgir alþjóðlegri en borgir yorubamanna og lengst í
norðri, en þær voru miklu minni.
Borgirnar Kano,
Zaria og Katsina í Nígeríska-Súdan í norðurhlutanum eru miklu eldri en
yorubaborgirnar. Þær þróuðust í tengslum við lestaferðirnar yfir Sahara
og landbúnaðinn. Fyrrum voru þær umgirtar skíðisgörðum til varnar.
Kano er mikilvægust þessara fornu borga. Hún skiptist í sérstök hverfi
hausa- og fulanimanna og Suður-Nígeríumanna og Evrópumanna.
Lagos
er alþjóðleg borg á nokkrum eyjum og á meginlandinu. Hún er stærsta
borg landsins og Ibadan næststærst. Lagos var líkast til stofnuð í
tengslum við útþenslu konungsríkisins Benín áður en 15. öldin gekk í
garð. Árið 1861, þegar Bretar náðu henni undir sig, voru þar 250 þúsund
íbúar. Í lok 20. aldar voru þeir orðnir 2 miljónir. Stofnun margra
fylkja síðan 1967 olli nokkurri dreifingu á iðnaði og margir
atvinnulausir Lagosbúar fluttust til höfuðborga annarra fylkja í
atvinnuleit (Ibadan, Kaduna, Kano og Enugu). Nokkrar litlar borgir (Minna,
Uyo, Makurdi, Maiduguri og Bauchi) uxu mjög hratt eftir að þær urðu
fylkishöfuðborgir.
Abuja var skipulögð í miðju landi og hefur verið opinber höfuðborg
landsins síðan 1991, þótt nokkrar opinberar stofnanir séu enn þá reknar
í Lagos. Ákvörðunin að byggja nýja höfuðborg var tekin um miðjan
áttunda áratuginn og hafizt var handa á hinum níunda. Staðarvalið
réðist m.a. af því, að enginn þjóðfélagshópur ætti að vera öðrum fremri
í borginni. Gwarifólkið, sem bjó á núverandi borgarstæði, varð engu að
síður að færa sig um set.
Talið er, að nálægt
250 þjóðflokkar byggi Nígeríu. Hver þeirra býr á sínu svæði og
aðkomufólk, sem býr og starfar með þeim, er ávallt utanveltu og blandast
ekki innfæddum. Víðast í sveitunum getur slíkt fólk ekki eignast land í
eigin nafni. Engu að síður hefur verið stöðugur straumur milli svæða í
þeim tilgangi.
Aðalþjóðflokkarnir
þrír eru hausa-fulani, yoruba og igbo. Hausafólkið, sem býr í
norðurhlutanum, fjölmennasti hópur landsins, hefur blandazt fulanihópnum.
Forfeður fulanimanna lögðu lönd hausafólksins undir sig á 19. öld.
Langflest þessa fólks er múslimar. Fulanimenn, sem búa í borgum setja
ekki fyrir sig að mæðgast við hausafólkið og aðra þjóðflokka en sitja
við stjórnvölinn í hausaborgunum. Fulanihirðingjar mæðgast sjaldan við
aðra hópa og tala tala fremur sitt eigið mál, fula, fremur en hausa.
Yorubamenn í suðvesturhlutanum eru litlu færri og áhrifaminni en
hausafólkið. Þeir hafa verið borgarbúar frá fornu fari og guð þeirra er
Oduduwa. Flestir yorubamenn eru bændur, sem búa í borgum eða þorpum.
Hver undirhópur þeirra er undir stjórn höfðingja, oba, sem er oftast
studdur höfðingjaráði. Trúarleiðtogar yorubamanna, obi, í Ife og alafin
í Oyo, sem er stjórnmálaleiðtogi þeirra, eru valdamestir og áhrifa
þeirra gætir í stóru sem smáu.
Þriðji stærsti þjóðfélagshópurinn er igbofólkið í suðausturhlutanum.
Það býr í smáum, lýðræðislegum byggðum. Þorpin eru aðalmiðstöðvar
þeirra. Þau eru undir stjórn öldunga, sem hafa áunnið sér sess en ekki
erft hlutverkið, fremur en höfðingja. Lítill hluti þeirra býr í stórum
borgum og eru menningarlega skyldari edofólkinu í nágrannaborginni Benín
en igbomönnunum, sem búa í neðri hluta Nígerdalsins.
Meðal fámennari hópa eru ibibiomenn, sem búa í grennd við igbofólkið og
eru menningarlega skyldir því, og edofólkið í Benínborg, sem stofnaði
konungsríkið Benín fyrir nýlendutímann, þótt það hafi orðið fyrir
nokkrum áhrifum frá nágrönnum sínum, yorubamönnum. Í miðbeltinu er að
finna flesta þjóðfélagshópana (>180). Tiv- og nupefólkið er þeirra
fjölmennast. Báðir hópar stunda ræktun. Nupefólkið býr við
höfðingjastjórn en tivfólkið hefur mun frjálslegri stjórnarhætti.
Tungumálum
landsmanna má skipta í þrjá aðalflokka: Niger-Kongó, Nílar-Sahara og
afró-asísk. Hinn fyrstnefndi er mjög fjölmennur en skiptist í kwa (yoruba,
edo, iio, igbo, iglala, idoma, nupe og gwari), vesturatlantsískar
mállýzkur fulatungunnar og tiv, jukun og fjölda annarra mállýzkna í
Krossárdalnum (efik, Ibibio, anang, ekoi) og adamawa (awak, waja, waka
og tula). Nílar-Sahara-málin í Nígeríu eru aðallega kanuri, þótt
nokkrir tali einnig bagirmi og zerma. Afró-asíska málafjölskyldan er
miklu stærri og nær yfir hausa, margi, bade o.fl. Sumir þjóðflokkar
(Fulani og tiv) eru tiltölulega nýfluttir til landsins. Samkvæmt
rannsóknum er talið, að flest tungumálin, sem eru töluð í landinu, megi
rekja allt að 4000 ár aftur í tímann á þeim slóðum, sem þau eru töluð
enn þá.
Hausamálið er útbreiddasta tunga landsins vegna þess að hún var opinbert
tungumál í norðurfylkjunum á árunum 1951-67 og hausa-fulanimenn hafa
haldið völdum sínum í landinu síðan. Enska er víða töluð og ausa og
pidgin eru mest notuð meðal almennings. Mörg þessara tungumála eiga
sitt eigið ritmál.
Í upphafi
nýlendutímans voru flestir Nígeríumenn fylgjendur hinna mismunandi,
fornu trúarbragða í landinu en brezku nýlenduherrarnir beittu slíkum
trúarbragðakúgunum, að flestir landsmenn voru orðnir múslimar eða
kristnir, þegar landi fékk sjálfstæði árið 1960. Þá gátu margir
múslimar og kristnir tekið upp helgisiði fornu trúarbragðanna, þar sem
þau voru ekki lengur bönnuð. Fylgjendur þeirra ákalla hinn almáttuga
guð (Olorun Olodumare hjá yorubamönnum, Chukwu hjá igbofólkinu, Osalobua
hjá edomönnum, Allah meðal hausamanna og Abasi Ibom meðal ibibiomanna) í
gegnum fjölda miðla eða lægra settra guða.
Trúfrelsi er tryggt samkvæmt stjórnarskrá landsins og múslimar og
kristnir búa og vinna saman, þrátt fyrir stöðugar erjur milli þeirra
innbyrðis og einnig fólks af öðrum trúarbrögðum. Flestir eru
múslimarnir í norðurfylkjunum, þar sem rúmlega 75% íbúanna játa islam.
Islam er einnig ríkjandi í suðurfylkjunum Lagos, Ogun og Oyo. Kristnir
eru rúmlega 75% íbúanna í austurfylkjunum. Kristnir
skiptast milli katólskra, meþódista, biskupakirkjunnar og baptista.
Vaxandi fjöldi sérsöfnuða er litinn hornauga og sem ógnun við hinn
hefðbundnu. Sérsöfnuðirnir hafa oft bætt ýmsum fornum hefðum við
helgisiðina, s.s. trumbuslætti og dansi, sem gömlu trúfélögin hafa
einnig tekið upp til að halda söfnuðunum saman. Bæði kristnir og
múslimar hafa bætt fjölkvæni við trúarbrögð sín. Opinberlega
viðurkennir kristna kirkjan það ekki en islam leyfir allt að fjórum
eiginkonum. Margir sérsöfnuðir hafa ekki sett neinar takmarkanir á
helgisiði og athafnir.
Líkt og í öðrum
þróunarlöndum er fæðingatíðni og barnadauði hár í landinu. Eftir 1950
hefur dregið verulega úr barnadauða og lífslíkur hafa stöðugt aukizt,
þannig að fólksfjölgun er mikil. Talsvert er um búferlaflutninga,
einkum í milli norðurs og suðurs. Fjöldi sunnanmanna hefur setzt að í
norðurborgunum Kano, sokoto, Kaduna og Jos og margir norðanmanna
flytjast árstíðabundið til kakóræktarhéraðanna í suðri. Enn fleiri hafa
flutzt frá löndum igbo- og ibibiomanna og frá Nígerósum til iðnvæddari
fylkja (Lagos, Oyo og Ogun) eða landbúnaðarfylkja (Ondo og Edo). Fjöldi
Nígeríumanna hefur flutzt úr landi til Stóra-Bretlands, Þýzkalands,
Kanada og BNA.
Fyrir lok síðustu
aldar olli borgarastyrjöldin 1970 miklum brottflutningi til Benín,
Ghana, Miðbauggíneu, Kamerún og Sierra Leone. Aðstreymi fólks til
Nígeríu hófst 1972 og yfirvöld hvöttu til meiri innflutnings, þegar
Efnahagsbandalag ríkja Vestur-Afríku var stofnað 1978. Snemma á níunda
áratugnum neyddust yfirvöld til að snúa blaðinu við vegna efnahagskreppu
og meintrar þátttöku útlendinga í trúarbragðaóeirðum. Í kringum 1985
var búið að reka 2,7 miljónir útlendinga úr landi en ekki var haldið
áfram á sömu braut eftir það. |