Zaria er borg í Kadunafylki í Norður-Nígeríu.  Hún er miðstöð járnbrautasamgangna í stóru baðmullarhéraði og mikið er verzlað með baðmull, jarðhnetur, húðir og skinn, engifer, bývax og fóðurgras.  Í borginni er járnbrautaverkstæði, baðmullarverksmiðjur og litun og framleiðsla olíu úr baðmullarfræjum, vindlinga, reiðhjóla, ilmvatna og sápu.  Ahmadu Bello-háskólinn var stofnaður 1962 og Katsina lista-, vísinda- og tækniskólinn 1974.  Byggðin, sem hófst þarna í kringum árið 1000, var kölluð Zazzau, meðan hún var hluti af Hausaríkinu.  Hún varð hluti Songhai-veldisins á 16. öld, féll í hendur fulanimanna á 19. öld og Breta 1901.  Áætlaður íbúafjöldi 1991 var 335 þúsund.