|
 Durban
(áður Port Natal) er stærsta borg KwaZulu-Natal-héraðs og aðalhafnarborg
S.-Afríku við Natalflóa í Indlandshafi.
Evrópskt landnám hófst þar, þegar hópur kaupmanna undir
forystu Francis G. Farewell kom þangað, kortlangði flóann og skírði
hann Natal Bay árið 1824.
Konungur Zúlúmanna, Shaka, lét þeim í té landrými og Old
Fort (Gamlavirki) var reist.
Þar er nú safn.
Durban var stofnuð við flóann 1835 og nefnd eftir Sir Benjamin
D’Urban, landstjóra Höfðanýlendu.
Þegar nær dró 1840 og skömmu síðar urðu árekstrar milli Bóa
og Breta vegna yfirráða í Durban.
Bærinn varð að borg 1854 og stórborg 1935.
Borgin
stendur á ströndinni og sunnan hennar er hæðótt landslag, Bluff,
sem nær yfir Umgeniána að hæðunum í norðri.
Borgarstæðið sjálft er á flatlendi, sem smáhækkar upp í
íbúðarhverfið Berea með hæðadrögum, sem liggja umhverfis höfnina
og ströndina.
Meðal fjölda garða borgarinnar er Lystigarðurinn með
orkideuskála, Jameson Park með rósareitum og Snákagarðurinn með
safni eitraðra skriðdýra.
Durban-Westville-háskólinn var stofnaður 1961 fyrir indverska
stúdenta í upphafi en eftir 1979 var engum af indverskum uppruna
veittur aðgangur.
Natalháskóli var stofnaður 1910.
Nokkur söfn eru í borginni og útimarkaðir, reknir af svörtum
og indverjum.
Þróun
hafnarinnar, sem er meðal stærstu verzlunarhafna heims, hófst 1855.
Hún þjónar m.a. Witwatersrand iðnaðarsvæðinu, sem þarfnast
mikils hráefnis, véla- og tæknibúnaðar.
Útflutningur byggist aðallega á kolum, sykri og kornvöru.
Olíuhreinsunarstöð birgir Jóhannesarborg um olíuleiðslu.
Eftir fyrri heimsstyrjöldina breyttist Durban úr viktorískri
borg í nútímaborg með háhýsum og skýjakljúfum.
Þar eru aðalstöðvar sykurframleiðenda í landinu og fjölþætt
framleiðsla.
Ferðaþjónustan er mikilvægur atvinnuvegur og byggist m.a. á
nálægð KwaZulu-Natal villidýrasvæðunum og fólkvöngunum, ströndunum
og aðstöðunni þar, s.s. sædýrasafni.
Í Durban og nærliggjandi Pinetown búa fleiri indverjar en hvítir.
Vesturhverfin, Ntuzuma, Umlazi og Embumbulu eru aðallega byggð
svertingum, einkum zúlúmönnum.
Fjöldi svertingja var fluttur þangað frá Durban síðla á áttunda
áratugi 20. aldar.
Áætlaður íbúafjöldi 1991 var 715.700 (borgin) og 1.137.400
(Stór-Durban og Pinetown). |
