Dakar er höfuðborg Senegal og ein aðalhafnarborganna við strendur Vestur-Afríku.  Hún er miðleiðis milli ósa fljótanna Gambía og Senegal á Grænhöfða, í grennd við vestasta hluta Afríku.  Höfnin er ein hin bezta í Vestur-Afríku í skjóli við kalkkletta höfðans og brimvarnargarða.  Nafnið er dregið af „dakhar”, sem þýðir tamarind-tré á volofmáli.  Löngu horfið þorp lebumanna, þar sem nú er fyrsta bryggjan, bar sama nafn.

Árið 1857 byggðu Frakkar virki, þar sem nú er Sjálfstæðistorg, til að vernda hagsmuni kaupmanna, sem höfðu verið að koma sér fyrir á staðnum næstu 20 árin á undan, og íbúa Gorée-eyjar skammt undan höfðanum.  Árið 1862 var kominn upp stuttur brimvarnagarður við Dakarhöfða og skipulag borgarinnar á lágum kalksteinspalli upp af sandströndinni var tilbúið.  Heill mannsaldur leið áður en mikilvægi Dakar varð meira en Gorée og Rufisque (21 km austar) sem útflutningshöfn.  Opnun fyrstu járnbrautar Vestur-Afríku, milli St Louis og Dakar, árið 1885 varð til hraðfara þróunar borgarinnar og aukinnar ræktunar jarðhnetna meðfram brautarteinunum.  Árið 1904 tók Dakar við höfuðborgarhlutverkinu af St Louis í Frönsku Vestur-Afríku.

Mikilvægi Dakar jókst enn í fyrri heimsstyrjöldinni.  Árið 1924 var opnuð járnbraut til Franska-Súdan (nú Mali), þannig að þaðan bárust vörur til útflutnings.  Miklar bætur voru gerðar á hafnarmannvirkjum og á fjórða áratugnum var útflutningur jarðhnetna mestur þaðan.  Í síðari heimsstyrjöldinni viðurkenndu yfirvöld í Dakar Vichy-stjórnina, sem yfirvöld í allri Frönsku Vestur-Afríku gerðu og tilraunir Frjálsra Frakka til að leggja Dakar undir sig hlutu slæman endi árið 1940.  Frekari þróun borgarinnar tafðist þar til Franska Vestur-Afríka gekk til liðs við bandamenn 1943.

Vinnsla jarðhnetuolíu varð mikilvægur iðnaður í borginni í síðari heimsstyrjöldinni vegna efttirspurnar í Norður-Afríku, sem hafði áður verið sinnt frá Frakklandi.  Fleiri verksmiðjur voru byggðar í borginni en árið 1961 skiptist Franska Vestur-Afríka í átta sjálfstæð ríki og markaðir Dakar minnkuðu.  Dakar var höfuðborg hins skammlífa Mali-ríkjasambands (1959-60) og árið 1960 varð hún höfuðborg lýðveldisins Senegal.  Eftir stríð hefur borgin þanizt út.

Borgarhlutarnir eru miklar andstæður.  Í suðurhlutanum eru opinberar byggingar, sjúkrahús og sendiráð.  Í norðurhlutanum er viðskiptahverfið, aðallega umhverfis Sjálfstæðistorgið.  Norðan- og austantil eru hafnarhverfin og allranyrzt er iðnaðarhverfið Hann.

Dakar er leiðandi miðstöð iðnaðar og þjónustu í hitabeltishluta Afríku.  Iðnaðurinn byggist á framleiðslu jarðhnetuolíu, niðursuðu fisks, hveitis, bjórs, vörubíla (samsetning) og olíuvöru.  Mörg söfn borgarinnar eru afbragðsgóð (mann- og fornleifafræði í Dakar og saga og sjávarlíffræði í Gorée).  Frá Corniche-veginum, sem er höggvinn í klettana umhverfis Manuelhöfða, er frábært útsýni yfir höfnina og nærliggjandi eyjar.  Þarna eru margar góðar baðstrendur.  Yoff-flugvöllur, norðan borgarinnar, er m.a. nýttur til millilendinga á leiðinni milli Evrópu og Suður-Afríku.  Áætlaður íbúafjöldi árið 1985 var 1,4 miljónir.