Mogadishu er höfuðstaður, stærsta borg og mikilvæg hafnarborg norðan miðbaugs í Sómalíu við Indlandshaf.  Borgarstæðið var meðal fyrstu byggða araba á strandlengju Austur-Afríku á 10. öld.  Þarna vorur stunduð mikil viðskipti við arabaheiminn fram á 16. öld, þegar verulega dró úr þeim.  Viðskiptasambönd við Portúgala og konunginn í Muscat voru einnig mikilvæg þar til soldáninn af Zanzibar náði völdum 1871.  Ítalar tóku höfnina á leigu árið 1892 og keyptu hana árið 1905 vegna þrýstings frá Bretum, sem höfðu gert soldánsdæmið Zanzibar að verndarsvæði sínu.  Síðar varð höfuðborg Ítalska-Sómalílands, Mogadishu, höfuðborg sjálfstæðrar Sómalíu árið 1960.

Gamlar byggingar og moskur í arabískum stíl blönduðust nútímabyggingum ríkisháskólans (1954; háskólaréttindi 1959) og sjúkrahússins.  Í borginni spruttu upp margs konar skólar, s.s. islamski lagaskólinn, kennaraskóli, iðnlistaskóli, lækna- og hjúkrunarskóli, dýralæknaskóli o.fl.  Þjóðminjasafninu var einnig valinn staður í fyrrum höll soldánsins af Zanzibar.

Höfn borgarinnar var stækkuð seint á sjöunda áratugnum.  Á níunda áratugnum og snemma á hinum tíunda olli borgarastyrjöldin mikilli eyðileggingu í borginni.  Millilandaflugvöllurinn er 8 km vestan borgarinnar.  Áætlaður íbúafjöldi árið 1985 var 700 þúsund.