Qabis er borg í suðaustanverðu landinu við mynni Qabis-árinnar.  Upptök hennar eru á Ras al-Qued-lindasvæðinu, 10 km frá ósunum.  Borgin er í vin á strönd Miðjarðarhafsins við Gabes-flóa.  Hún var stofnuð sem rómverskur verzlunarstaður og hét þá Tacapa.  Þegar Tyrkir réðu ríkjum, fór henni aftur en á dögum Frakka lifnaði svolítið yfir henni á ný.  Þá var byggt upp vega- og járnbrautakerfi og höfnin var gerð.  Þessi nútímaborg er enn þá mikilvæg vin og miðstöð viðskipta.  Fiskveiðar, ávaxtarækt og textíliðnaður eru undirstöðuatvinnugreinar.  Þarna eru líka efna, járn- og sementsverksmiðjur.  Umhverfi borgarinnar eru hálfeyðimerkursvæði í miðsuðurhlutanum.  Þar eru þorpin Matmatah, þar sem berbar rækta ólífutré, al-Hammah, sem er markaðsþorp Beni Zid-hirðingjanna og nokkrar aðrar vinjar.  Áætlaður íbúafjöldi árið 1984 var rúmlega 90 þúsund.