Safaqis er mikil hafnarborg í miðausturhluta Túnis á norðanverðri strönd Gabes-flóa.  Safaqis er næststærsta borg landsins.  Hún reis á grunni tveggja þorpa í fornöld, Taparura og Thaenae.  Snemma á dögum islam varð hún að markaði fyrir hirðingja.  Normanar, sem komu frá Sikiley, lögðu hana undir sig um tíma á 12. öld og á 16. öld komu Spánverjar.  Um tíma var borgin aðsetur Barbary-sjóræningja.  Frakkar létu sprengjum rigna yfir borgina árið 1881, skömmu áður en þeir lögðu Túnis undir sig, og í síðari heimsstyrjöldinni, þegar möndulveldin réðu yfir henni.  Þá náðu Bretar henni á sitt vald árið 1943.  Bygging nútímahafnarinnar hófst árið 1895.

Safaqis er nú miðstöð samgangna og útflutingshöfn fosfats frá Qafsah-héraðinu og er í vega- og járnbrautasambandi við það.  Höfnin þjónar líka talsverðum fiskveiðiflota, sem aflar hráefnis fyrir niðursuðuverksmiðjur.  Auk fosfats er talsvert flutt út af ólífuolíu, espartograsi og svömpum.  Gamla arabahverfið (medina) með 10. aldar mosku og kastala (casbah) er umkringd upprunalegum múrum, sem voru byggðir á 9. öld.  Umhverfis borgina er ræktað espartogras, grænmeti og ólífur.  Innar í landinu eru olíulindir og leiðslur.  Áætlaður íbúafjöldi árið 1984 var rúmlega 230 þúsund.