Adelaide Ástralía,
Flag of Australia


ADELAIDE
ÁSTRALÍA
.

.

Utanríkisrnt.

Booking.com

Adelaide er höfuðborg fylkisins Suður-Ástralíu og hin fjórða stærsta í landinu.  Hún er á suðausturhluta meginlandsins, nærri miðjum austurhluta St. Vincentflóa, vestan fjallsins Lofty Ranges á strandláglendinu.  Allt umhverfis borgina eru friðlýst svæði.  Fyrsta lögfesta skipulag hennar kom úr höndum fyrsta húsameistara fylkisins, William Light ofursta, skömmu eftir að nýlendan var stofnuð 1836.  Borgin var nefnd í höfuð Adelaide drottningar, konu Williams 4. Englandskonungs.

Skipulagið byggðist á tveimur ferhyrningum, sem Torrensáin rennur á milli.  Áin var stífluð, þannig að þar myndaðist stöðuvatn, sem gerði og gerir borgina meira aðlaðandi.  Suðurhlutinn varð að miðstöð viðskipta en í norðurhlutanum er að mestu íbúðabyggð.  Aðalgatan, William konungsgata, liggur frá suðri til norðurs og Viktoríutorg rýfur hana á leiðinni.  Margar fagrar byggingar prýða borgina, s.s. enska biskupakirkjan St. Peters, rómversk-katólska kirkjan St. Francis Xavier og stríðsminnismerki fylkisins helgað Suður-Áströlum, sem létu lífið í fyrri heimsstyrjöldinni.  Þinghús fylkisins eru byggð úr graníti og marmara.  Hvort tveggja var sótt í námur innan fylkisins.  Háskólinn í Adelaide, sem var stofnaður 1874, og Ástralska safnið eru áhugaverð skoðunar.

Listmenntaskóli Adelaide var stofnaður 1979.  Alþjóðleg listahátíð borgarinnar var haldin í fyrsta skipti árið 1960.  Hún var hin fyrst sinnar tegundar í Ástralíu.  Hátíðamiðstöðin, byggð 1980, er fjölnota vettvangur fyrir leiklist.  Frjósamar sléttur umhverfis borgina og jarðefni í hæðunum í kring ollu hraðri uppbyggingu.  Verksmiðjur borgarinn framleiða bifreiðahluta, vélar, vefnaðarvörur og efnavörur.  Borgin er miðstöð samgangna, járnbrauta, skipa, loftflutninga og vega.  Höfnin er í Port Adelaide 11 km norðvestan borgarinnar.  Loftslagið er þægilegt, vetur stuttir, rakir og svalir en sumrin löng, þurr og heit.  Hitinn fer sjaldan niður fyrir frostmark.  Meðalúrkoma er 53 sm.  Árið 1987 var íbúafjöldinn rúmlega ein milljón.

 TIL BAKA     Ferðaheimur - Garðastræti 36 - 101 Reykjavik - info@nat.is - Heimildir            HEIM