Geelong er hafnarborg við Corio-fjörð (innfjörður úr Port Philip-flóa) í Viktoríufylki í Suðaustur-Ástralíu, u.þ.b. 61 km suðvestan Melbourne.  Hún er önnur stærsta borg fylkisins.  Þarna er góð höfn með járnbrautatengingum og tækjum til útskipunar ullar og hveitis og upphaf hinnar svokölluðu Stóru sjávarleiðar.  Aðaliðnaðurinn tengis olíuhreinsun, framleiðslu hveitis, salts og ullardúks.  Þarna eru samsetningarverksmiðjur fyrir bíla og landbúnaðartæki auk fjölda víngerða.  Borgin er mikilvæg miðstöð viðskipta.

Geelong fékk borgarréttindi 1849 og óx hratt, þegar gull fannst í fylkinu 1851.  Þangað kom fjöldi innflytjenda á þeim tíma og mikið var flutt út af gulli.  Deakin-háskóli (1974) og fjöldi áhugaverðra bygginga (listasafnið, Ullarsafnið og Tollhúsið) eru í borginni.