Dili er höfuðborg Austur-Timor.  Yfirbragð hennar er rólegt og þægilegt.  Meðfram ströndinni eru gömul nýlenduhús og öflugt, portúgalskt virki frá 1627.  Mestur hluti borgarinnar var eyðilagður 1999 og húsin, sem eftir standa, bera merki um átökin í landinu.  Á strandlengjunni heldur lífið áfram sinn vanagang og fólkið slappar þar af eða stundar viðskipti.  Dili er katólsk borg og þar er fjöldi kirkna og stór stytta af Kristi uppi á hæð á skaganum Fatucama, sem minnir á Río de Janeiro.  Þaðan er mjög gott útsýni en þar hefur fólk orðið fyrir líkamsárásum og ránum.  Nokkrar góðar baðstrendur eru á þessu svæði og aðstæður til köfunar eru mjög góðar.  Vinsælasta strandsvæðið er við skjólgóða vík, Areia Branca (Pasir Putih = Hvítusandar), u.þ.b. 3 km austan borgarinnar.  Atauroeyja sést frá ströndinni en þangað eru engar skipulagðar ferðir.  Sé haldið vestur frá Dili á strandveginum, eru nokkrar góðar strendur á leiðinni og meðfram veginum eru söluborð með fiski og ávöxtum.  Eftir einnar stundar akstur frá Dili birtist Liquica, þar sem fjöldamorð voru framin 1999.  Þar er svört sandströnd, sem margir njóta í skugga nokkurra trjáa.