Landið
hefur verið byggt síðan á forsögulegum tímum og nokkur þúsund
grafir á norðurhluta Bahrain-eyju eru líklega frá dögum súmera á
þriðju teinöld fyrir Kristsburð.
Þar var hin forna Dilmun (Telmun), rík verzlunarborg, sem
tengdi Súmeríu við Indusdalinn fyrir u.þ.b. 4000 árum.
Persneskir, grískir og rómverskir landfræðingar nefndu
eyjaklasann í ritum sínum. Þjóðin
hefur verið islömsk síðan á 7. öld, þótt Portúgalar réðu ríkjum
á árunum 1521-1602 og Persar frá 1602-1783.
Síðan þá hefur kalífafjölskylda frá Al-Hasa-héraði í
Arabíu verið við völd.
Bretar
skárust oft í leikinn á Persaflóa á 19. öld til að draga úr sjóránum
og bæla niður skærur og einnig til að koma í veg fyrir, að
Egyptar, Persar, Þjóðverjar eða Rússar kæmust til áhrifa á svæðinu.
Fyrsti sáttmálinn milli Breta og Bahrainbúa var undirritaður
árið 1820, þótt landið yrði ekki að brezku verndarsvæði fyrr en
1861, þegar konungur landsins samþykkti að hætta hernaði, sjóránum
og þrælahaldi. Bretar tóku
að sér varnir landsins og utanríkismál.
Árið 1947 varð Bahrain verndarsvæði hins brezka Indlands um
tíma vegna viðskipta- og hernaðarlegra hagsmuna Indlands á Persaflóasvæðinu.
Bretar tóku aftur við Bahrain, þegar Indland fékk sjálfstæði.
Íranar héldu uppi kröfum um yfirráð í landinu fram til
1970, en þeim var ætíð hafnað.
Bretar
ákváðu að draga sig í hlé og kölluðu allar herdeildir sínar frá
landinu árið 1968 og ‘Isa ibn Sulman al’Khalifah, konungur, lýsti
yfir sjálfstæði landsins í ágúst 1971.
Vináttusamningur milli Bretlands og Bahrain var undirritaður og
‘Isa konungur var gerður að emir.
Þá gerðist landið aðili að Sameinuðu þjóðunum og
Arababandalaginu.
Þegar
sjálfstæðið var orðið að veruleika, magnaðist spenna milli shíta-meirihlutans
og sunnítastjórnar landsins, einkum eftir byltinguna í Íran árið
1979. Þessi pólitíska ólga
nærðist á hnignandi efnahag vegna lækkunar olíuverðs og samdráttar
í olíuframleiðslu, samdráttar í útgjöldum ríkisins og viðvarandi
misréttis gagnvart shíta-meirihlutanum.
Hamad konungur, sem tók við völdum að föður sínum látum
í marz 1999, leysti fjölda shíta úr fangelsi sama ár til að draga
úr spennunni.
Árið
1981 var Bahrain meðal fimm Persaflóaríkja, sem stofnuðu Samstarfsráð
Persaflóa (GCC), sem leiddi til frjálslegri viðskipta og nánari
efnahags- og hernaðarlegra tengsla milli þessara ríkja.
Í Persaflóastríðinu 1991 opnaði Bahrain hafnir og flugvelli
sína fyrir bandamönnum, sem tóku Kúvæt úr höndum Íraka.
Bahrainmenn hafa löngum verið frjálslyndari en Sádiarabar,
þótt þeir hafi að mestu fylgt þeirra fordæmi í utanríkismálum. Bygging hraðbrautarinnar milli Bahrain og Sádi-Arabíu
hefur styrkt tengsl landanna og varnarsamband og hefur einnig styrkt löndin
efnahagslega og stjórnmálalega. Bahrain
hefur haldið uppi tiltölulega vinsamlegu sambandi við BNA og hefur
leyft fimmta flota Bandaríkjanna að hafa aðstöðu í landinu.
Tengsl Írana við shíta í Bahrain, landakröfur þeirra og
óánægja vegna veru Bandarískra herskipa á svæðinu hefur valdið
stirðu sambandi milli landanna. Deilurnar
milli Bahrain og Qatar vegna Hawar-eyja eru óleystar enn þá. |