Montgomery er höfuðborg Alabamafylkis á frjósömu landbúnaðarsvæði, sem er kallað Svarta beltið.  Þar er mikið verzlað með baðmull og búfénað og mikill iðnaður á sviði framleiðslu pappírs, vela, húsgagna, vefnaðarvara, efna og lyfja, kælibúnaðar, hugbúnaðar og fullvinnslu.  Ýmsar aðrar greinar vega þungt í efnahagslífinu, s.s. skipasmíðar, ferðaþjónusta, byggingarstarfsemi, ríkisstofnanir, fjármálastofnanir og nærliggjandi Gunter-herflugvöllurinn.

Alabama Fylkishálskólinn var stofnaður 1874, Auburn-háskólinn 1967, Huntington-miðskólinn 1854 og Troy Fylkisháskólinn 1966.  Meðal áhugaverðra staða eru Þinghúsið í grískum endurreisnarstíl (1851), Montgomery listasafnið, W.A. Gayle stjörnuskoðunarstöðin, mannréttindaminnisvarðinn (1989), reistur til minningar um 40 manns, sem létu lífið í baráttunni fyrir kynþáttajafnrétti á árunum 1954-1968, Cramton Bowl leikvangurinn, þar sem miðskólalið keppa í ruðningsbolta eftir aðalvertíðina, Garrett Coliseum og Junius Bragg Smith leikhúsið.

Árið 1819 voru tvö þorp, sem voru sameinuð, á núverandi borgarstæði og Montgomery varð til.  Borgin var nefnd eftir Richard Montgomery, hershöfðingja í bandaríska frelsisstríðinu.  Hún varð að miðstöð plantekranna í fylkinu og tók við höfuðborgarhlutverkinu af Tuscaloosa árið 1847.  Fimm árum síðar var hún kominn í járnbrautarsamband til suðvesturs og norðausturs.  Borgin var kölluð „Vagga Suðurríkjanna” og var höfuðborg þeirra til maí 1861.  Á sjötta og sjöunda áratug 20. aldar var borgin vettvangur mikillamótmælaaðgerða og ofbeldis.  Árið 1955 vannst einn veigamesti sigur jafnréttisbaráttunnar, þegar aðskilnaður kynþátta í strætisvögnum og rútum var afnuminn.  Martin Luther King, Jr. stýrði baráttunni, sem leiddi til þessarar niðurstöðu, og samtökin efldust mjög í kjölfarið.  Áætlaður íbúafjöldi 1980 var 177.900 og árið 1990 var hann 187.100.