Anchorage er stærsta borg Alaska.  Hún er í suðurmiðhluta fylkisins við mynni Cookfjarðar.  Flugtíminn þangað frá Seattle er u.þ.b. 3 klst.

Árið 1741 komu rússneskir sæfarar undir stjórn Danans Vitus Bering til meginlands Alaska.  Síðan komu brezkir, spænskir og bandarískir landkönnuðir.  Árið 1867 keyptu BNA Alaska af Rússum.  Gullfundurinn árið 1887 og síðar (1922) inni landi var aðalhvati þróunarinnar á Anchoragesvæðinu.  Árið 1914 hófst lagning járnbrautar frá hafnarbænum Seward, 208 km sunnan Anchorage, um kolasvæðin inni landi til gullsvæðanna við Fairbanks, 591 km norðar.  Framkvæmdum við miðhluta járnbrautarinnar var stjórnað frá Anchorage og í júlí 1915 voru komnar þangað þúsundir manna í atvinnuleit.  Þetta fólk bjó í tjöldum á bökkum Shipárinnar rétt hjá núverandi miðbæ borgarinnar.  Í þessum mánuði fór hin svokallaða „Stóra lóðasala” fram.  Á henni byggðist framtíð borgarinnar og alls seldust 655 lóðir fyrir $148.000.-, eða $225.- hver.  Mánuði síðar var ákveðið í kosningum að nefna borgina Alaskaborg en sambandsstjórnin neitaði að breyta nafninu úr Anchorage.  Fimm árum seinna sleppti Bandaríkjastjórn stjórntaumunum og bæjarstjórnarkosningar voru haldnar í fyrsta skipti. Þessi hraðvaxandi bær liggur norðar en Helsinki í Finnlandi og 571 km sunnan heimsskautsbaugs.  Á árabilinu 1939-57 stækkaði borgin hratt vegna framkvæmda hersins og ríkisstjórnarinnar við lagningu vega, byggingar flugvalla og hafna vítt og breitt um fylkið.  Höfnin var tilbúin snemma á sjöunda áratugnum.

Snemma morguns á föstudaginn langa 27. marz 1964 reið gríðarlegur jarðskjálfti yfir og stór hluti miðbæjarins í Anchorage hrundi til grunna.  Hundruð heimila, fjölbýlishúsa og fyrirtækja voru í rúsum og margir týndu lífi. Íbúðarhverfin umhverfis, sérstaklega Tunagain, og nærliggjandi borgir urðu fyrir miklu tjóni.  Enduruppbyggingin hófst strax með undraverðum hraða.  Á áttunda áratugnum kom aftur fjörkippur, þegar vinnsla olíu í Prudhoeflóalindunum og Alaskaolíuleiðslan var lögð.  Á tíu ára tímabili þrefaldaðist íbúafjöldinn, íbúðar- og skrifstofuhúsnæði.

Icelandair flýgur til Anchorage borgar. Ferðatímabil 14. maí til 28. október 2014.

ALASKA