Haleakala þjóðgarðurinn á austanverðri Maui-eyju var stofnaður 1916 og nær yfir 116 ferkílómetra, forkunnarfagurt svæði.  Þar er Puu Ulaula-gervitunglastöðin, sem fylgist með ferlum gervitungla og virkni Haleakala-gígsins, stærsta óvirka gíg heims, 700 m djúpum og 34 km í þvermál.  Litskrúðugir gjallgígar af öllum stærðum prýða gígbotninn og þangað leggja gestir leið sína gangandi.  Oft er lágskýjað á þessum slóðum og þá fá gróðurblettir í gígnum nægan raka (sandalviður, fléttur og sjaldgæfar plöntur).  Kipahulu-dalurinn í austurhlíðum eldfjallsins er ríkulega vaxtinn hitabeltisgróðri.  Öldum saman hefur Haleakala (Hús sólarinnar) verið helgur staður í hugum innfæddra og leifar gamals upphlaðins vegar sjást í gígnum.  Haleakala þjóðgarðurinn var upprunalega tengdur Eldfjallaþjóðgarðinum á Hawaii-eyju og hét þá Hawaii-þjóðgarðurinn.