Heildarflatarmál fylkisins er 314.939 ferkílómetrar (5. í stærðarröð BNA).  Sambandsstjórnin á 33,1% landsins.  Það er nokkurn veginn ferhyrnt í laginu, 630 km frá norðri til suðurs og 565 km frá austri til vesturs.  Hæðarmunur er frá 866 m til 4.011 m á toppi Wheeler-tinds í norðurhlutanum.  Meðalhæð yfir sjó er nálægt 1.737 metrum.

Landslag er mjög fjölbreytilegt, allt frá eyðimerkurlægðum til hárra, snævi þakinna tinda.  Austurþriðjungur fylkisins er hluti Sléttanna miklu.  Hluti þeirra sunnan Kanadaárinnar er þekktur undir nafninu Háslétturnar (Llano Estacado) og í norðurhlutanum eru veðrað landslag (mesas og buttes).  Fjallshryggir Klettafjalla teygjast inn í miðnorðurhlutann.  Rio Grande-gljúfrið liggur frá norðri til suðurs og klýfur þetta fjallendi.  Austan þess eru Sangre de Cristo-fjöllin og vestan þess eru Nacimiento-fjöllin.

Í mið- og suðvesturhlutum fylkisins eru fjallgarðar og dalir og eyðimerkurlægðir.  Kolóradósléttan teygist inn í norðvesturhornið.  Þar eru víðir dalir og sléttur með djúpum gljófrum.  San Juan-lægðin í norðausturhorninu er tiltölulega flatlend.

Helztu vatnsföll landsins eru Rio Grandi, Pecos (þverá), Kanadaáin, Chaco, San Juan, Gila og San Francisco.  Stöðuvötn eru fá og flest í fjallgörðum miðnorðurhlutans.  Meðal stórra manngerðra lóna eru Elephant Butte-lónið, Conchas, Caballo, Navajo og Sumner.
Loftslagið.  Þurrt og hálfþurrt meginlandsloftslag ríkir í landinu.  Úrkoma og hiti fer mikið eftir landslagi en í heildina tekið er rakastig lágt og sólskin mikið.  Dagfarssveiflur hita eru miklar.  Meðalárshiti er á bilinu 4,4°C í fjalllendinu í miðnorðurhlutanum til 17,8°C í suðurhlutanum.  Lægsta skráð hitastig er -45,6°C (1951) og hið hæsta 46,7°C (1934).  Mestur hluti úrkomunnar fylgir þrumuveðrum.

Flóra og fána.  Rúmlega 6000 tegundir plantna hafa fundizt í landinu (grös, runnar, kaktus, baunatré, artemisiarunnar, baðmullartré, eyðimerkurvíðir, kreósótrunnar, einir, fura, ponderosa, eik, hlynur, ösp, greni og birki).

Tegundir villtra dýra eru margar vegna fjölbreytilegs landslags (svartbjörn, antilópur, fjallaljón, gaupa, múldýr, dádýr, sléttuúlfur, barbarafé, kanína, greifingi, sléttuhundur, minkur og bifur).  Helztu veiðifuglar eru sléttuhænsn, lynghænur, orrar, fasanar og villikalkúnar.  Skröltormar eru víða og tarantúla í suðvesturhlutanum.  Í ferskvatni þrífast urriði, bassi, krappi og karfi.

Auðlindir, framleiðsla, iðnaður.  Námugröftur stendur undir 10% af vergri þjóðarframleiðslu.  Miklar birgðir af kolum, olíu og náttúrugasi eru í jörðu.  Hvergi er meira unnið af pottösku og kopar í BNA.  Einnig eru talsverðar birgðir af gulli, silfri, járni, blýi, mangan, molybdenum og sínki.  Landbúnaður og kvikfjárrækt (2% þjóðarframl.).  Mest áherzla er lögð á heyskap og ræktun baðmullar og grænmetis.

Iðnframleiðslan stendur undir 7% vergrar þjóðarframleiðslu.  Aðalframleiðsluvörur eru rafeindatæki, nákvæmnistæki, samgöngutæki, prentað mál, vélabúnaður, matvæli, vörur úr steini, leir og gleri og timbur og trjávörur.  Handverksiðnaðurinn er mikilvægur fyrir flest indíánasamfélög.  Ferðaþjónustan er geysimikilvæg.