Raleigh, höfuðborg Norður-Karólínu, er miðstöð viðskipta og dreifingar afurða geysimikils landbúnaðarhéraðs og iðnaðar, sem framleiðir m.a. rafeinda- og raftæki, vefnaðarvörur og matvæli.  Borgin er setur fylkis- og borgarstjórnar, fjármála- og byggingarfyrirtækja.  Raleigh, Durham og Chapel Hill eru miðstöðvar vísindarannsókna og menntastofnana á borð við Meredith-háskóla (1891), Fylkisháskólann (1887), Shaw-háskólann (1865) og Háskóla hl. Ágústíns (1867).  Meðal áhugaverðra staða í Raleigh eru þinghúsið (1833-1840), lögþingshúsið (1963; Edward Durell Stone), Fylkislistasafnið, Sögusafn fylkisins og Náttúrugripasafnið.

Í kjölfar frelsisstríðsins ákváðu íbúar Norður-Karólínu að stofna varanlega höfuðborg og henni var valinn staður 1788.  Skipulag hennar var tilbúið 1792 og hún var nefnd eftir Sir Walter Raleigh.  Þinghúsið (1794) brann til grunna árið 1831 og núverandi grísk endurreisnarbygging var fullbyggð árið 1840.  Áætlaður íbúafjöldi árið 1990 var 208 þúsund.