Indíánar, sem stunduðu grafhaugagerð, settust
að við árnar á austuhluta svæðisins í kringum 1500. Í
upphafi 18. aldar bjuggu þar ojibwa- og yanktonai
sioux-indíánar. Vestur reikaði tetonættkvísl sioux um
slétturnar. Meðfram Missouri-ánni voru mandan, arikara og
hidatsa sem bjuggu í jarðhýsum og stunduðu akuryrkju.
Landkönnun og landnám. Fyrstu Evrópumennirnir á þessum
slóðum voru í fransk-kanadíska leiðangrinum með Pierre
Gaultier de Varennes, sieur de La Vérendrye, sem heimsótti
Mandan-þorp í grennd við núverandi Bismarck árið 1738.
Skinnakaupmenn frá verzlunarstöðum hans komu í kjölfarið og
verzluðu við indíána við Rauðá alla leið suður að Grand
Forks. Eftir 1790 byggðu Kanadíska norðvesturfélagið og
Hudsonflóafélagið verzlunastaði við Rauðá í norður- og
norðausturhlutunum.
Norður-Dakota varð eign BNA í Louisiana-kaupunum 1803 en
ekki var samið um landamærin við Kanada fyrr en 1818. Hvítt
landnám hófst árið 1812, þegar fólk frá Selkirkbyggðinni í
Winnipeg (Kanada) stofnaði nýlendi í Pembina.
Dakotahérað, sem náði yfir núverandi Norður- og Suður-Dakota,
Wyoming og Montana, var stofnað 1861. Þegar stríð brauzt út
milli landnemanna og indíána í Minnesota 1862, leituðu
margir indíánar skjóls í Dakota en flestum þeirra var síðar
komið fyrir á svæðinu vestan Missouri-árinnar.
Járnbrautirnar fluttu landnema að austan eftir 1870, þ.á.m.
marga norska og þýzka innflytjendur. Bonanza jarðaæðið olli
svo miklum aðflutningi landnema á árunum 1875 til 1890, að
íbúafjöldinn gerði fylkisstofnun kleifa árið 1889. Harðæri
drógu ekki úr fjölgun íbúanna. Lýðveldisflokkurinn, undir
stjórn Alexander McKenzie, réði ríkjum til 1906.
Árið 1917 komst sósíalistaflokkurinn NPL (Non-partisan
League) til valda eftir mikil hallæri meðal bænda. Þá voru
reistar ríkisreknar verksmiðjur og Norður-Dakotabanki var
stofnaður. Þessi flokkur missti stjórnartaumana 1921. Á
þriðja áratugnum lækkaði afurðaverð og margir bankar urðu
gjaldþrota. Í heimskreppunni á fjórða áratugnum fluttist
mikill fjöldi fólks frá fylkinu. Sambandsstjórnin varð að
grípa í taumana og koma efnahagnum á réttan kjöl. Í síðari
heimsstyrjöldinni blómstraði hann. Í olíukreppunni á
áttunda áratugnum blómstruðu vestræn ríki, sem áttu olíu- og
kolabirgðir í jörðu. Eftir 1960 breyttist
stjórnmálaástandið nokkuð, þegar demókrataflokkurinn náði að
halda í fylkisstjóraembættið í 20 ár. Á níunda áratugnum
fækkaði íbúum fylkisins og fyrir aldamótin voru íbúarnir
færri en þeir voru árið 1920. Árið 1993 ollu flóð í ánum
miklum skaða. |