Fort Worth er veigamikil miðstöð samgangna og fjölbreytt iðnaðarborg í Texas (farartæki, lyf, matvæli, tölvur, olíuvörur og eldsneyti.  Þar er Kristni fylkisháskólinn (1873), Wesley-háskólinn (1891), Suðvestur-baptista-guðfræðiskólinn (1908) og Beinalækningaháskólinn (1970).  Meðal margra menningastofnana eru Will Rogers minningarmiðstöðin, Amon Carter-safnið og Fort Worth-vísinda- og sögusafnið.  Alþjóðleg keppni í píanóleik, kennd við Van Cliburn, er haldin á fjögurra ára fresti.

Árið 1849 var byggð herstöð til að vernda landnema gegn árásum Comance-indíána.  Hún var nefnd eftir William Jenkins Worth hershöfðingja, sem tók þátt í Mexíkóstríðinu og byggðin varð viðkomustaður á Chisholm-leiðinni, sem var m.a. notuð til nautgriparekstrar til Kansas.  Lagning járnbrautarinnar 1876 efldi atvinnu- og efnahagslíf byggðarinnar, sem varð markaðsborg fyrir nautgripi og síðar kornvöru.  Nútímaiðnvæðing borgarinnar hófst, þegar olía fannst í jörðu í næsta nágrenni árið 1920.  Í síðari heimsstyrjöldinni elfdist hagur borgarinnar enn vegna þarfa hersins og byggingar herstöðvar. Áætlaður íbúafjöldi 1990 var tæplega 448 þúsund.