Heildarflatarmál fylkisins er 62.759 ferkílómetrar (41.
í stærðarröð BNA). Sambandsstjórnin á 9,1% landsins. Fylkið er
nokkurnveginn sporbaugslagað með landræmur til norðausturs og norðurs.
Mesta vegalengd frá austri til vesturs er 425 km og 380 km frá norðri
til suðurs. Hæð yfir sjó er frá 73 m meðfram Potomac-ánni í
norðaustri til 1.482 m á toppi Spruce Knob í austri. Meðalhæð yfir
sjó er 457 m, sem gerir Vestur-Virginíu að hæstliggjandi fylkinu
austan Mississippi-fljótsins.
Berggrunnir alls fylkisins er fellingasetlög og það skiptist í tvær
landfræðilegar einingar: Dala- og hryggjasvæðið og útverði Allegheny-fjalla.
Hin fyrrnefnda er tiltölulega lítill hluti þessa svæðis í
austurhlutanum. Það er mikið fellingahrúgald með mjóum og hvössum
sandsteinshryggjum og dölum á kalk- og leirsteinsgrunni. Útverðir
Allegheny-fjalla er austurjaðar Allegheny-hásléttunnar, sem rís upp í
1.219 m.y.s. Appalachia-hásléttunni hallar smám saman til norðvesturs,
niður að Ohio-ánni, þar sem hæðin yfir sjó er 305 m. Hæðarmunur milli
dalbotnanna og hryggjanna er rúmlega 305 m við Allegheny jaðarinn en
minnar niður fyrir 152 m við ána. Jarðvegur er þunnur og víðast
ófrjósafmur nema þar, sem hann hefur myndazt á kalkundirlagi.
Meðal helztu vatnsfalla eru Ohio, Monongahela og Kanawha. Stór
stöðuvötn eru engine í landinu en nokkur stór lón hafa myndazt ofan
stíflna í ám (Bluestone, East Lynn, Summersville og Tygart).
Loftslagið. Í Vestur-Virginíu ríkir rakt meginlandsloftslag með
hlýjum sumrum og svölum og stundum köldum vetrum. Það er svolítið
mismunandi milli svæða vegna hæðarmunar yfir sjó. Meðalhiti í janúar
í Charleston í vesturhlutanum er 1,4°C og í júlí 23,9°C. Sambærilegar
tölur í Elkins í austurhlutanum eru -1,1°C og 24,1°C. Lægsta skráða
hitastig er -38,3°C (1917 í Lewisburg) og hið hæsta 44,4°C (1930 í
Moorefield og 1936 í Martinsburg). Fellibyljir og skýströkkar eru
fátíðir en þrumuveður á sumrin geta valdið skyndiflóðum.
Flóra og fána. Skóglendi þekur u.þ.b. þriðjung landsins (beyki,
túlipanatré, linditré, hlynur, hestakastanía, eik, óðjurt, hikkorí og
fura). Meðal blómplantna eru alparós, lárviður, kastanía, gullsproti,
azalea og stjörnufíflar.
Meðal villtra dýrategunda eru: Dádýr, svartbjörn, refur, þvottabjörn,
þefdýr, pokarotta, íkorni og jarðsvín. Fuglategundir eru margar (spör,
spæta, lynghæna, kalkúnar o.fl.).
Auðlindir, framleiðsla, iðnaður. Biknám er undirstaða kunnasta
iðnaðar í landinu. Kolaframleiðslan hefur ætíð verið í 2-3 sæti í BNA
frá upphafi 20. aldar og landið er í flokki 10 fremstu fylkjanna í
nýtingu annarra náttúruauðlinda (olía, gas, kalk, grjót, sandur, möl
og leir).
Hrjúft landslag fylkisins er ekki landbúnaðarvænt. Helztu
landbúnaðarafurðir eru nautakjöt, fóður, kjúklingar, mjólkurvörur,
epli, maís, kalkúnar, egg, svínakjöt, hafrar, hveiti, tóbak, ferskjur,
kirsuber og brómber.
Nýting skóga byggist á ræktuðum trjám (eik, ösp, beyki o.fl.
harðviðartegundir), sem eru nýtt í timbur, girðingastaura og til
pappírsgerðar.
Helztu iðnaðarvörurnar eru frummálmar (járn, stál og ál), gler,
leirmunir, vélbúnaður til iðnaðar, prentað efni, timburvörur, matvæli,
rafeindatæki og vefnaðarvörur. |