Bora-Bora er eldfjallaeyja í Frönsku-Pólýnesíu (utanlandshérað í Frakklandi) í Suður-Kyrrahafi.  Hún er ein hléeyjanna í Félagseyjaklasanum.  Hún er umkringd kóralrifjum og er 39 ferkílómetrar að flatarmáli.  Hæst rís hún á tindi Otemanufjalls (727m; Temanu).  Vaitape á vesturströndinni er eina þéttbýlið og íbúarnir, sem voru 4.225 árið 1988, lifa af ferðaþjónustu og framleiðslu kókoskjarna.  Bandaríkjamenn höfðu herstöð á eyjunni í síðari heimsstyrjöldinni.