Borgin hét áður Sao Salvador eða Bahia.  Hún er höfuðborg Bahia-fylkis og hafnarborg á skaganum við mynni todos os Santos-flóann.  Hún er mikilvæg viðskiptaborg og þaðan er aðallega flutt út kaffi, tóbak, sykur, baðmull, iðnaðardemantar og olíuvörur.  Aðaliðnaðurinn byggist á skipasmíðum, sykurvinnslu, baðmullarvinnslu, hveitivinnslu og tóbaki.

Borgin stendur í fjallahlíðum og efri hlutinn er tengdur neðri hlutanum með lyftum, kapalbrautum og bugðóttum götum.  Borgin er setur Sambandsháskólans (1946).  Portúgalar stofnuðu borgina árið 1549 undir nafninu Sao Salvador Da Bahia de Todos os Santos.  Hún var setur landstjóra og höfuðborg portúgölsku nýlendunnar til 1763 og varð höfuðborg fylkisins árið 1889.  Áætlaður íbúafjöldi árið 1993 var tæplega 2,2 milljónir.