Santos er hafnarborg í Sao Paulo-fylki á eyjunni Sao Vicente í grennd við Sao Paulo-borg.  Hún er í rauninni aðalhafnarborg Sao Paulo og mikilvæg miðstöð kaffiviðskipta en auk þess er mikið flutt út af ávöxtum, baðmull og kjötvörum.  Aðalinnflutningurinn er vélar.  Kaffimarkaðurinn er meðal áberandi byggingar borgarinnar og nokkur útivistarsvæði hennar eru vinsæl.  Borgin var stofnuð árið 1543 og tenging við járnbrautarkerfi landsins gerði hana að líflegri hafnarborg árið 1867.  Áætlaður íbúafjöldi árið 1991 var í kringum 430.000.