Århus er höfðuborg Århushéraðs á Jótlandi við Århusfjörð (inn úr Kattegat).  Hún er hafnarborg og miðstöð skipasmíða og olíuhreinsunar.  Einnig er framleiddur vélbúnaður, flutningatæki, matvæli og bjór.  Áhugaverðir staðir:  Vorfrúarkirkjan (11. öld), Gamli bærinn (útisafn miðaldabygginga) og Ráðhúsið (1938-42).  Háskólinn var stofnaður árið 1928.

Borgin varð biskupssetur árið 948 og dafnaði undir stjórn katólskra biskupa á 14. og 15. öld.  Heldur hnignaði henni eftir siðbótina á 16. öld en uppgangur hófst á ný með skipasmíðum á 19. öld.  Áætlaður íbúafjöldi árið 1992 var 210 þúsund (275 þúsund með útborgum).