Flatarmál þessa brezka yfirráðasvæðis syðst á Spáni er 5,8 km².  Borgin er á stöllum alveg frá sjávarmáli upp í 90 m hæð í vestanverðum hlíðum hins 426 m háa Kletts.  Þessi klettaskagi, sem er oft kallaður „Lykillinn að Miðjarðarhafinu”, hefur verið undir brezkum yfirráðum síðan 1704 en hefur haft heimastjórn síðan 1969. Syðst á skaganum er fjall, sem Bretar nefna „The Rock” en arabar Djebel al-Tarik.  Norðan þess er lágt eiði, sem tengir það við meginlandið.  Allt frá upphafi brezkra yfirráða hefur Kletturinn verið vel víggirtur og þar er herstöð sjóhersins, sem fylgist aðallega með umferð um Njörvasund milli Atlantshafs og Miðjarðarhafs.

Skaginn er úr kalksteini og hellubergi.  Kletturinn er andspænis Ceuta, spænsku yfirráðasvæði í Marokkó, 32 km sunnan hans, handan Njörvasunds.  Gíbraltar státar ekki af ám eða lindum, þannig að 14 hektarar sandorpins lands hafa verið þaktir vatnsþéttu efni til að taka við rigningarvatni, sem er geymt í fjölda tanka, sem voru sprengdir inn í Klettinn.  Þetta vatn er blandað með lindarvatni frá Spáni eða eimuðu vatni úr sjó.  Sjór er notaður til ýmissa þarfa, s.s. klósettskolunar.  Sumrin í Gíbraltar eru heit og rök en hér um bil úrkomulaus.  Vetur eru mildir og nægilega úrkomusamir.  Vor og haust eru hlýjar árstíðir með vægri úrkomu.