Chuuk-eyjar, áður Truk-eyjar, er klasi eyja í Austur-Karólínuklasanum í Vestur-Kyrrahafi.  Þær eru u.þ.b. 50 talsins og allar eldfjallaeyjar með hringkóralrifjum, sem ná yfir svæði með 65 km þvermáli.  Chuuk-eyjar eru hluti af Bandaríkjum Míkrónesíu.  Aðalstjórnsýslumiðstöð Chuuk-eyja og aðaleyjan er Moen.  Áætlaður íbúafjöldi árið 1990 var 45.000.

Sjálfsþurftarbúskapur og fiskveiðar eru helztu atvinnuvegir landsmanna.  Þeir rækta mest af brauðaldinum, taro, kókoshnetum og banönum.  Víða á hærri eyjunum eru ræktaðar stórar kartöflur (yams), kassava og sætar kartöflur.  Þá eru einnig ræktuð hænsni, svín og hundar til matar.  Aðaltekjur landsins eru byggðar á styrk frá BNA, sem jafngildir u.þ.b. 70% af vergri þjóðarframleiðslu.  Ríkið er stærsti launagreiðandi landsins.  Útflutningurinn, sem stendur undir tæplega 5% af vergri þjóðarframleiðslu, byggist aðallega á kópra, fiskafurðum, svörtum pipar og handverki.  Ríkið hefur tekjur af sölu veiðikvóta í landhelgi eyjanna og ferðaþjónustan vex hægum skrefum.