Nauru eyja Míkrónesía,


NAURU


.

.

Utanríkisrnt.

Booking.com

Naurueyja (Naoero) er eyja í Bandaríkjum Míkrónesíu í Mið-Kyrrahafi, rétt sunnan miðbaugs og 4000 km norðaustan Ástralíu.  Hún er ávöl kóraleyja, 21 km² að flatarmáli.  Áætlaður íbúafjöldi hennar var rúmlega 10 þúsund árið 1996 (489 manns á hvern km²).  Meirihluti (58%) íbúanna eru innfæddir, 26% frá öðrum Kyrrahafseyjum, 8% kínverjar og 8% Evrópumenn.  Hinir innfæddu eru blandaðir Pólýnesar, Míkrónesar og Melanesar.  U.þ.b. 75% íbúanna eru kristnir.  Tunga innfæddra og enska eru aðaltungumálin.  Yaren-sýsla er höfuðborg eyjarinnar.  Langflestir íbúanna búa á frjósamri strandlengjunni hringinn í kringum eyjuna.  Inni á eyjunni er Miðsléttan í u.þ.b. 61 m hæð yfir sjó.  Þar eru einhverjar mestu birgðir af gæðafosfati í heiminum.

Efnahagslífið. 
Gjaldmiðill landsins er Ástralíudalur (100 sent).  Landsmenn njóta ríkulegra umboðslauna fyrir námuvinnsluna (fosfat), þannig að eyjaskeggjar eru meðal hinna ríkustu á Kyrrahafseyjum.  Verg þjóðarframleiðsla Nauru jafngildir US$ 8.070.- á mann.  Árið 1994 voru 6.800.000 tonn af fosfati flutt til Ástralíu, Nýja-Sjálands, Filipseyja, Suður-Kóreu og Japans, aðallega til áburðarframleiðslu.  Snemma á tíunda áratugnum dró úr eftirspurn eftir fosfati.  Fosfatnámið hefur spillt náttúru eyjarinnar verulega og búist er við að námurnar endist til ársins 2000.  Að því loknu verða u.þ.b. 80% eyjarinnar óbyggileg nema miklum fjármunum verði varið til umbóta.  Stjórn eyjarinnar hefur notað stórar fjárhæðir til fjárfestinga erlendis og hvatt til uppbyggingar iðnaðar til að tryggja efnahagslífið í framtíðinni.  Árið 1993 var gengið frá samningi við Ástralíu um 80 miljónir Ástralíudala vegna tjónsins, sem námugröfturinn olli á meðan Ástralar réðu eyjunni.

Sagan.  Litlum sögum fer af íbúum eyjarinnar fyrir 1798, þegar John Feam, skiptstjóri, kannaði eyjuna.  Þjóðverjar lögðu eyjuna undir sig 1888 og fosfatbirgðirnar voru uppgötvaðar 1899.  Ástralía fékk yfirráðin 1914 og árið 1920 tóku Bretar við þeim samkvæmt úrskurði Þjóðabandalagsins.  Japanar hersátu Nauru á árunum 1942-45 og 1947 varð eyjan verndarsvæði Sameinuðu þjóðanna undir stjórn Ástrala.  Eyjaskeggjar fengu sjálfstæði og lýðveldi var stofnað 31. janúar 1968.  Sama ár varð hún aðili að Brezka samveldinu.  Þingið starfar í einni deild og þingmennirnir 18 eru kjörnir til þriggja ára í senn.  Þeir kjósa forseta landsins.  Nauru er ein eyjanna, sem stafar veruleg ógn af hækkun sjávarstöðu á 21. öld vegna hækkandi meðalhita í heiminum.  Árið 1995 var mótmælarödd Naurustjórnar hvað hæst gegn tilraunum Frakka með kjarnorkuvopn, sem þeir tóku upp á ný.

 TIL BAKA     Ferðaheimur - Garðastræti 36 - 101 Reykjavik - info@nat.is - Heimildir            HEIM