Félagseyjar eru stór eyjaklasi í Suður-Kyrrahafi.  Þær eru hluti utanlandshéraðs Frakklands í Frönsku-Pólýnesíu.  Eyjaklasanum er skipt í tvennt, Hléeyjar og Áveðurseyjar.  Meðal Hléeyja eru Raiatea, Huahine, Tahaa og Bora-Bora og meðal Áveðurseyja eru Tahiti, Moorea og Mehetia.  Heildarlandflatarmál allra eyjanna er u.þ.b. 1.685 ferkílómetrar, þar af Tahiti 1.036.  Eyjarnar mynduðust í eldgosum, þær eru fjöllóttar og umkringdar kóralrifjum, sem mynda strandlón.  Hæsti tindur þeirra er Orohena á Tahiti (2.241m).  Loftslagið er heitt og rakt.  Helztu landbúnaðarafurðir eru kókoshnetur, kaffi og vanilla.  Aðalútflutningsvörur eru kókoskjarnar, kaffi, perlumóðir og vanilla.  Ferðaþjónustan er mikilvæg atvinnugrein.  Áætlaður íbúafjöldi eyjaklasans árið 1988 var 162.573.

Evrópumenn komu fyrst til eyjanna árið 1607, þegar portúgalski sæfarinn og landkönnuðurinn Pedro Fernandes de Queirós var á ferðinni.  Brezki landkönnuðurinn James Cook skrifaði fyrstu nákvæmu lýsingu eyjanna eftir heimsóknir sínar árin 1769, 1773, 1774 og 1777.  Eyjarnar urðu franskt verndarsvæði árið 1843 og frönsk nýlenda 1880.  Þær urðu utanlandshérað Frakklands árið 1958.