Norðurhluti aðaleyjarinnar, Honshu, er oftast kallaður Norðaustur-Japan eða Tohokuhérað. Þar er allt með rólegra yfirbragði og vingjarnlegra en í þéttbýlinu sunnar.

Sendai  er héraðshöfuðborg og hin þýðingarmesta í þessum lands-hluta.  Hún er kunn fyrir hefðbundnar handiðnir (lakkvörur, kopar- og járnvörur, vefnaðarvörur og Kokeshidúkkurnar).  Á veturna er fremur kalt og það snjóar allmikið, þannig að umhverfis borgina eru ágæt skíðasvæði (t.d. við Zaofjall).  Þar eru og náttúruverndar- og hverasvæði.

Á fjögurra stunda ferð með lest frá Tokyo sjást m.a. á báðar hendur hefðbundin bændabýli með stráþökum.  Alls konar iðnaður fer vaxandi í borginni.

Matsuhima er sjávarútvegs- og baðstrandarbær í fornfrægu umhverfi.  Lestir aka þangað á hálftíma frá Sendai.  Á flóanum eru rúmlega 260 furuvaxnar eyjar, sem siglt er út í með gesti.  Landslagið í bakgrunni borgarinnar er vinsælt göngu- og útivistarsvæði með fallegu útsýni.

Sé haldið til vesturs eftir breiðgötu, girta sedrustrjám, birtist *Zuiganji-hofið, sem var stofnað árið 828 og varð síðar miðstöð Zen-trúarflokksins Rinzai.  Beggja vegna breiðgötunnar eru hellar, sem munkarnir notuðu til hugleiðslu.  Núverandi hof voru byggð árið 1609.  Inni í byggingunum eru áhugaverðar höggmyndir og málverk.

Aomori  er mikilsverðasta borgin allra nyrzt á Honshu og ferju-staður, þaðan sem siglt er til Hokkaido.  Það er verið að grafa neðansjávargöng fyrir járnbraut á milli eyjanna.

Sunnan Aomori er Towada-Hachimantai-þjóðgarðurinn í skógi vöxnu fjall-lendi umhverfis *Towada-vatnið, sem er stærsta fjallavatn Japans.  Þangað er 1½ klst. akstur frá Towada-Minamibrautarstöðinni.  Á hringlaga vatninu eru furu vaxnar smáeyjar.  Þar er hægt að kaupa leyfi til silungsveiði í júlí og ágúst.  Við vatnið og á öðrum skoðunarverðum stöðum á svæðinu umhverfis eru margir Ryokan.

Norðan þjóðgarðsins, u.þ.b. 35 km frá Aomori, eru Hakkodafjöll, sem eru forn eldfjöll.  Þar eru tjaldstæði og aðstaða til fjallgangna og vetraríþrótta.