Umhverfis Kanadaflekann eru stór láglendissvæði á setlögum, s.s. heimskautssvæðið í norðri, vötnin miklu og St. Lawrenceláglendið í suðri og suðaustri og vesturslétturnar.  Stærstu slétturnar teygjast frá Íshafinu suður að landamærunum BNA og frá vesturbrún Kanandaflekans að undirhlíðum Klettafjalla.  Meðfram mótum flekans og sléttnanna er fjöldi stöðuvatna, s.s. Great Bear, Great Slave og Winnipegvatn, sem eru öll stærri en Ontaríóvatn.  Manitobaláglendið er í suðausturhlutanum, víðast lægra en 330 m yfir sjó.  Það hvílir á vatnaseti hins stóra Agassizvatns, sem var til á ísöld, og er flatlendasti hluti innsléttnanna.  Þar eru stöðuvötnin Manitoba, Winnipegosis og Winnipeg.  Frjósamur suðurhluti þessa svæðis, Rauðárdalurinn, er þakinn svörtum leir og setjarðvegi.

Vestan Manitobaláglendisins hækkar landið í tveimur þrepum upp á Saskatchewansléttuna (280-680m) og Albertasléttuna (>750m).  Þessar sléttur eru hæðóttar (jökulöldur) og þaktar framburði ísaldarjöklanna á nokkurn veginn sléttu bergi.  Þar eru líka vatnsfylltir katlar og flatbotna dalir, sem jökulsárnar grófu og eru nú farvegir fljóta eins og Assiniboine, Sascachewan og Qu’Appelle.  Báðar þessar sléttur eru þaktar smávötnum og tjörnum.  Kýprushæðirnar í Saskatchewan og Alberta rísa upp í 1460 m hæð yfir sléttuna og eru því hæsti hluti landsins milli Klettafjalla og Labrador.

Mackenzieláglendið, þakið mýrum og ótræðiðsflóum, nær frá Albertasléttunni að Íshafinu og myndar vatnasvið Mackenzieárinnar.

Vötnin miklu og St. Lawrenceláglendið.  Þetta svæði nær yfir suðurskaga Ontaríó, að Huron-, Erie- og Ontaríóvatni og jarðri Kanadaflekans.  Það teygist meðfram St. Lawrendeánni alla leið að Atlantshafinu.  Þótt svæðið sé tiltölulega lítið miðað við önnur mun stærri, er það mikilvægt fyrir landbúnað, þróaðan iðnað og mörg þéttbýlissvæði.

Jökullinn hefur mótað hæðótt landslagið við vötnin miklu og St. Lawrence og skilið eftir merki sín þar, s.s. forna vatnsbotna, setsléttur, öldur, grjóthryggi, hvalbök og risaárfarvegi, suma fyllta seti og hryggjum (esker).  Niagarajaðarinn í Suðvestur-Ontaríó er greinilegustu ummerkin um grunnbergið, sem teygjast frá fossunum að Bruceskaga vestan Georgianflóa og áfram út á Manitoulineyju.  Hluti af Kanadaflekanum, Frontenac-öxullinn, rýfur láglendið í Suðaustur-Oontaríó og myndar Þúsundeyjar handan St. Lawrenceárinnar.

Norðaustan öxulsins teygist láglendið inn í Ottawa- og St. Lawrencedalina u.þ.b. 116 km frá Quebecborg.  Á síðustu ísöld lá þetta svæði undir sjó, Champlainhafi, sem hörfaði og skildi eftir mjög flatt sléttlendi með Monteregianhæðunum sjö í grennd við Montreal.  Vestust hæðanna er Mont-Royal, u.þ.b. 250 m há.