Viktoríueyja er önnur stærsta eyjan í kanadíska eyjaklasanum.  Hún skiptist milli Nunavuthéraðs og Norðvesturhéraðanna og milli hennar og meginlandsins eru Dolphin- og Unionsund, Coronationflói, Deasesund og Queen Maudflói.  Hún er u.þ.b. 515 km löng, 270-600 km breið og 217.291 km² að flatarmáli.  Landslagið hækkar frá vogskorinni ströndinni upp í 655 m á norðvesturhlutanum.

Eyjan er mjög strjálbýl og flestir íbúanna búa í þorpinu Holman á vesturhlutanum og Cambridgeflóa (Ikaluktutiak) á suðausturhlutanum, þar sem er veðurathugunarstöð.  Thomas Simpson fann eyjuna 1838 og nefndi hana eftir Viktoríu Bretadrottningu.  John Rae kannaði hana fyrstur árið 1851.