Karíbaeyjarnar liggja í boga á 4000 km langri landbrú milli N.- og S.-Ameríku, frá Flórída til Venezúela.  Þær eru mjög misstórar en eru samtals u.þ.b. 234.000 km2.  Flestar þeirra, að Bahamaeyjum undanskildum, liggja þær á milli 10° N og hvarfbaugs nyrðri (23°27' N.).  Þær eru allar hitabeltiseyjar, þótt loftslag sé nokkuð misjafnt eftir landslagi og stærð.

Antileyjar ná yfir 95% flatarmálsins.  Helmingur þeirra er fjalllendi.  Þær draga nafn af hinni dularfullu eyju "Antilia", sem álitin var liggja milli Evrópu og Asíu áður en Ameríka fannst.  Eyjabogi Antileyja byrjar u.þ.b. 200 km austan Yukatanskagans í Mexíkó með Kúbu, sem                 liggur 180 km sunnan Flórída.

Stóru-Antileyjar eru Kúba, Jamaica, Hispaniola og Puerto Rico (u.þ.b. 90% flatarmáls Karíbaeyja).

Litlu-Antileyjar eru margar og litlar, oft nefndar Vindeyjar.  Þær eru flokkaðar í Hlé- og Áveðurseyjaklasana (Lee- and Windward-Islands), þ.e.a.s. Norður- og Suðureyjar á milli  Jómfrúareyja nyrzt og Trinidad syðst.  Síðan liggur röð eyja meðfram na-strönd S.-Ameríku milli Margrétareyjar í austri og Aruba í vestri.

Caymaneyjar eru sunnan Kúbu.  Það er langt á milli þeirra og þær standa á neðansjávarhrygg.

Bahamaeyjar liggja norðaustan Kúbu og norðvestan Hispaniola ásamt Turks- og Caicoseyjum.  Þær eru misstórar og teygjast allnærri ströndum Flórída. Þær teljast ekki til Karíbaeyja af landfræðilegum sökum en verða engu að síður í hópi þeirra í þessum ferðavísi.

Bermúdaeyjar eru einangraður eyjaklasi í V.-Atlantshafi á 32°18' N. og 64°46' V.  Þær standa á hringlaga neðansjávareldfjalli og eru að mestu úr kalki.  Golfstraumurinn gerir þær að nyrztu kóraleyjum heims.  Þær tilheyra ekki Karíbaeyjum en verða engu að síður nefndar í þessum ferðavísi.