Auknar
skærur og fíkniefnasala.
Þjóðfélagsbreytingar ollu nýjum vandamálum á sviðum stjórn-,
efnahags- og félagsmála, sem stöfuðu af ójafnri þróun,
misskiptingu arðsins og auknum skilningi fólksins á hvoru tveggja.
Takamarkaður árangur hefur náðst á þessum sviðum síðan
1974 en efnahagur landsins hefur batnað á tímabilinu, þrátt fyrir
ófriðinn innanlands og vaxandi fíkniefnasölu.
Þegar
tími þjóðstjórnarinnar var á lokastigi kom fíkniefnavandinn upp
á yfirborðið.
Vaxandi hluti landsins í fíkniefnasölunni í heiminum mætti
öflugri andstöðu í átaki gegn fíkniefnaumferðinni í Mexíkó
1975. Kólumbía
seldi þá u.þ.b. 70% alls marijuana, sem var flutt til BNA.
Eiturlyfjakóngarnir í Medellín notuðu hagnaðinn til að koma
fótunum undir kókeinviðskiptin.
Það dugði ekki lengur að senda einstaklinga með smáskammta
hverju sinni og farið var að nota báta og flugvélar til flutninga
mikils magns í einu.
Tvenn samtök, sem voru skipulögð eins og mafían, þróuðust
af þessum ólöglegu og arðsömu viðskiptum.
Önnur samtökin voru í Medellín undir forystu Pablo Excobar og
hin voru í Cali.
Umskiptin
frá þjóðstjórn til hóflegrar samkeppni í stjórnmálum milli frjálslyndra
og íhaldsmanna 1974 gengu tiltölulega vel fyrir sig.
Alfonso López Michelsen, fulltrúi frjálslyndra, var forseti á
árunum 1974-78 og við tók Julio César Turbay Ayala, frjálslyndur miðjumaður.
Kosningaþátttaka var enn þá dræm vegna þess að almenningur
óttaðist að herinn gripi inn í af minnsta tilefni.
Árið
1982 klofnaðu stuðningsmenn frjálslyndra og Belasiario Betancur
Cuartas, íhaldsmanður, var kosinn forseti.
Í forsetatíð hans var mikil ólga, óeirðir og ofbeldi, sem
var mikið álag á lýðræðið í landinu.
Árið 1984 létu eiturlyfjahringarnir myrða dómsmálaráðherra
landsins.
Árið eftir lögðu M-19 skæruliður dómshöllina í Bogotá
undir sig og hélt þar fjölda gísla.
Þegar herinn réðist til inngöngu í dómshöllina, féllu u.þ.b.
100 manns, þ.á.m. helmingur dómara hæstaréttar.
Þessir atburðir gáfu rækilega til kynna vaxandi áhrif og völd
eiturlyfkjabarónanna og augljósa vanhæfni ríkisstjórnarinnar til að
halda skæruliðum í skefjum.
Betancur
reyndi að leiða ofbeldi skæruliðanna til lykta.
Í nóvember 1982 undirritaði hann lög um sakaruppgjöf
langflestra uppreisnarmannanna og næstu árin tókst honum að fá FARC
og M-19 til að taka þátt í vopnahlénu.
Samtímis tóku æ fleiri hópar lögin í sínar hendur á þeim
forsendum, að þeir væru að verja hendur sínar.
Tíðum voru þetta hópar, sem landeigendur höfðu safnað í
kringum sig til varnar gegn skæruliðum.
Kólumbíski herinn þjálfaði suma þessa hópa, sem störfuðu
innan ramma laganna að undirlagi ríkisstjórnarinnar á sjöunda áratugnum.
Virgilio
Barco Vargas, fyrrum borgarstjóri Bogotá, varð forseti 1986.
Hann vonaðist til að geta komið á réttum lögum og reglu en
skæruliðarnir gerðust athafnasamari en nokkurn tíma áður og varðliðarnir
drápu fleiri en uppreinarmennirnir.
Eiturlyfjabarónarnir, einkum Medellín-bandalagið, hóf hryðjuverkastarfsemi
til að komast í betri samningsstöðu gagnvart ríkisstjórninni.
Morð urðu tíðasta dánarorsökin og árið 1989 varð mesta
ógnarár í blóðugri sögu landsins.
Fleiri voru drepnir en nokkurt ár á meðan ógnaröldið
svokallaða stóð yfir.
Barco
þurfti líka að glíma við hrakandi efnahag vegna minnkandi framleiðni.
Uppgötvun mikilla birgða olíu 1985 varð aðalhvati efnahagsbóta
og dró verulega úr þörf landsins fyrir innflutta orku.
Eiturlyfjaverzlunin
var stundum hagkvæm landinu, þótt hún væri stöðugt pólitískt
vandamál.
Því efnaðri sem eiturlyfjasalar urðu, þeim mun meiri
peningum vörðu þeir til framleiðslu kókeins, varðliðahópa og
byggingarstarfsemi (íbúðarhúsnæði og fyrirtæki).
Fleiri landsmenn nutu góðs af eityrlyfjagróðanum en af lögmætri
starfsemi.
Í
framboðsslagnum fyrir forsetakosningarnar 1990 voru þrír
forsetaframbjóðendur, þ.á.m. Luis Carlos Galán, og hundruð annarra
drepnir í hefndarskyni, þegar eiturlyfjasalarnir risu gegn hertri
stefnu og aðgerðum gegn sölu eiturlyfja.
Helmingur íbúanna greiddi atkvæði í kosningunum í maí, þrátt
fyrir hótanir um hryðjuverk.
Sigurvegari kosninganna var fyrrum fjármálaráðherra landsins
og harðlínumaður gegn eiturlyfjum, César Gaviria Trujillo, fulltrúi
frjálslyndra.
Í
valdatíð hans var lögð meiri áherzla en nokkurn tíma áður á útrýmingu
ofbeldis.
Forsetinn efndi til stjórnarskrárþings, sem samþykkti nýja
stjórnarskrá 1991 í stað hinnar eldri frá 1986.
Í kjölfarið var leitað allra leiða til samninga við skæruliða
FARC og ELN, einkum í Caracas í Venesúela og í Tlaxcala í Mexíkó
og óvæntir samningar náðust við forsprakka eiturlyfjabandalaganna
og varðliðahópana.
Stjórnarskrárbreytingarnar
voru veigamiklar, a.m.k. á pappírunum.
Framboð forseta var takmarkað við eitt kjörtímabil og frambjóðendur
urðu að fá hreinan meirihluta atkvæða, þótt kjósa yrði í annað
sinn. Öldungadeildarþingmenn
skyldu kosnir í almennum kosningum, þannig að það var tæknilega mögulegt
fyrir litla flokka að fá menn kjörna með aðein 1% af atkvæðafjölda.
Ný kosningalög voru samþykkt og dómskerfið og saksókn var
sniðin eftir bandarískri fyrirmynd.
Samningar
tókust ekki við skæruliða en samningar leiddu til uppgjafar flestra
forsprakka Medellín-bandalagsins.
Pablo Escobar slapp úr fangelsi eftir 13 mánaða setu.
Hans var leitað og hersveit drap hann skömmu síðar.
Í lok kjörtímabils Gaviria hafði ekki dregið úr ofbeldinu
í landinu, þrátt fyrir góða viðleitni.
Stjórn
Gaviria hélt áfram á sömu braut og Braco í efnahagsmálum.
Kólumbíumenn tóku upp svipaða stefnu og flest önnur ríki
Latnesku-Ameríku og lækkuðu innflutningstolla, drógu úr fátækraaðstoð
og minnkuðu afskipti ríkisins af efnahagsmálunum.
Færri ríkisfyrirtæki voru einkavædd í Kólumbíu en í
Latnesku-Ameríku vegna þess að færri fyrirtæki voru ríkisrekin en
í nágrannalöndunum.
Í
forsetakosningunum 1994 sigraði Ernesto Samper Pizano, frambjóðandi
frjálslyndra, íhaldsmanninn Sandrés Pastrana í annarri umferð.
Allt kjörtímabilið staglaðist Pastrana á því, að hann hefði
vídeóupptöku af Samper í viðræðum við eiturlyfjabarónana í
Cali um framlag í kosningasjóð hans.
Á þessu kjörtímabili voru forsprakkar Cali-samtakanna teknir
höndum, dæmdir og stungið í fangelsi.
Þingið
neitaði að ákæra Samper en ólöglegir skæruliðahópar, aðrir öfgamenn
og ríkisstjórn BNA álitu hann sekan.
Óöldin magnaðist og varðliðar Carlos Castano stofnuðu samtök,
sem þeir kölluðu „Sameinuðu sjálfsvarnarsamtök Kólumbíu
(Autodefensas Unidas de Colombia; AUC).
Liðsmenn þessara samtaka báru merki samtakanna á herklæðum
sínum og skíðahettur á höfði.
Andrés
Pastrana sigraði í kosningunum 1998 og reyndi að semja við FARC og
ELN á fyrsta ári í embætti.
Efnahagur landsins var bágstaddur á þessum tíma.
Á morgni nýrrar aldar ríkti enn þá óvissa í
efnahagsmálunum. |