Íbúar u.þ.b. 1 milljón, þar af u.þ.b. 500.000 í Georgetown.  Heitir eftir pinang (betel-hnetupálmanum), sem er mikið ræktaður á eyjunni.  Penang er tengd meginlandinu með lengstu brú Asíu, 13,5 km.  Eyjan er elzt hinna þriggja svonefndu sundanýlendna (Malakka og Singapúr), sem soldáninn af Kedah eftirlét Austur-Indíafélaginu 1785 og Bretar hernámu 1786 undir stjórn Francis Light skipstjóra.

Á flatlendum austurhluta eyjarinnar er Georgetown (400.000 íb.), einnig nefnd Penang.  Borgin er vinsælasti ferðamannastaður Malaysiu og ein líflegasta hafnarborg Asíu.  Hún heillar ókunnuga með austurlenzkum blæ.  Miðborgin er þægilega stór til að komast um gangandi og öll stóru hótelin eru innan seilingar.  Bezt nýtur fólk andrúmslofts borgarinnar að kvöldi til á Penangvegi, Campell Street eða Chulia Street, þar sem er aragrúi af verzlunum.

Ýmislegt skoðunarvert er í Georgetown, s.s. margar minjar frá nýlendutímanum (gröf Francis Light, Fort Cornwallis frá 1810, kirkja hl. Georgs, sem er elzta biskupakirkja Sa-Asíu frá 1818 o.fl. byggingingar).

Kvöldmarkaðir.  Í Georgetown eru mörg útiveitingahús og matarvagnar, t.d. við Gurney Drive og Explanade, þar sem er upplagt að bragða á sérréttum Penang (alltaf að gæta að því, að maturinn sé vel soðinn).  Malam-basarinn er fluttur úr stað á tveggja vikna fresti, svo að athuga verður hvar hann er hverju sinni.  Þar er mikið úrval af fatnaði og búsáhöldum o.fl. Hann er ekki kominn á gott skrið fyrr en eftir kl. 20:00 á kvöldin.

Lyfjate er vinsælt.  Einn tevagnanna í Georgetown er með skilti, sem á stendur, að teið lækni m.a. höfuðverk, magaóreiðu, nýrnatruflanir, malaríu og kóleru og „fartulence" (vindgang)

Nokkru vestan Georgetown er bærinn Ayer Itam.  Þar er kínverska hofið Kek Lok Si, sjö hæða bygging.

Útsýni frá garði Penang Hill hótelsins er afargott.

Sigling á hraðbátum umhverfis eyjuna tekur u.þ.b. 2 klst.

Hjá Batu Ferringgi, 17 km norðan G., eru mjög fallegar og góðar baðstrendur.

Fort Cornwallir.  Byggt 1808-10 úr timbri upprunalega á staðnum, þar sem Francis Light skipstjóri lenti á Penang 17. júlí 1786.  Algengt er að óbyrjur færi blóma- og reykelsisfórnir (joss-sticks) við stóru fallbyssuna (reðurtákn) á hornveggnum vinstra megin við aðalinn-gang.

Klukkuturninn.  Maður að nafni Chen Eok afhenti innfædda milljónamæringnum Cheah turninn sem gjöf til Penangbúa til minningar um demantsafmæli Viktoríu drottningar á valdastóli, 60 ár.  Turninn er ríflega 18 m hár.

Kongsis eru upprunnin í Kína fyrir mörgum öldum fyrir félagsstarf þeirra, sem bera sama ættarnafn.  Nú á dögum beina þessi félög kröftum sínum að því að styrkja félaga sína og varðveita trúarsiði, þannig að kongsi er líka hof.  Ættarhúsin fá tekjur af fasteignum, sem þau eiga og lánum, sem þau veita félögum gegn háum vöxtum.  Flest ættarhúsin í Penang voru stofnuð snemma á 19. öld, þegar ófriður ríkti milli ættanna með blóðhefnd og tilheyrandi.  Hvert ættarhús hefur eigin kirkjugarð.  Innandyra eru nöfn forfeðranna skráð á skilti,  eitt nafn á hvert, og alltaf bætist við.  Nöfn þeirra, sem skarað hafa fram úr á einhverju sviði, eru hengd upp í sérstökum heiðursal.  Flest ættarhúsanna eru einungis ætluð körlum, en Ong og Khaw ættirnar heiðra líka dætur sínar.

**Khoo Kongsi  er ríkasta ættarhús Penang.  Þar er að finna fagran og vandaðan drekafjallasal, sem var reistur 1906 af kínverskum fagmönnum úr efni frá Kína.  Endurnýjun fór fram á miðjum 6. áratugnum.  Þar er að sjá fagra kínverska list, högg- og útskurðarmyndir.  Þetta hús er meðal skrautlegustu ættarhúsa í Malaysiu og vel þess virði að skoða það.  Það er opið frá kl. 09:00 - 17:00 mánudaga til föstudaga og milli 09:00 og 13:00 á laugardögum.  Fólk verður að fá leyfi á skrifstofu ættarhússins til heimsóknar og er það oftast auðfengið.

Snákahofið.  Byggt 1850.  Hofið er helgað Chor Soo Kong.  Á meðan frumskógurinn hafði ekki verið ruddur næst hofinu, flykktust snákar inn í það í leit að skjóli og hafa ílenzt þar.  Þeir eru af tegundinni Wagler's Pit Wiper, sem er baneitruð.  Þeir hringa sig um gripi á altarinu og á bak við það hálfsofandi af reykelsisanganinni og eru því hér um bil hættulausir.  Í hliðarsal, strax til hægri, þegar komið er inn í hofið, getur fólk látið taka af sér myndir með snáka um hálsinn og haldandi á þeim.  Þeir segja að enginn hafi verið bitinn við þá iðju enn þá !

**Kek Lok Si í Ayer Hitam.    Stærsta og fegursta búddahof og klaustur í Malaysiu.  Það nær yfir 30 ekrur lands (ca 12 hektara), þannig að byggingarnar eru margar, þ.á.m. hof hinna 10.000 búddalíkneskja.  Það tók nokkra áratugi og aragrúa fagmanna frá Kína, Búrma og fleiri löndum að byggja það.  Verkið hófst seint á 19. öld með byggingu hofs gyðju miskunarinnar, Kuan Yiu, þar sem stóð áður lítið hof helgað sömu gyðju.  Hofi hinna 10.000 búdda, sem einnig er kallað hof Rama V (tælenzkur konungur) var lokið 1927.  Í einum hofgarðanna eru tvær tjarnir með hundruðum skjaldbakna, sumar orðnar margra áratuga gamlar og tjörn með ferskvatnsfiski.  Kínverjar líta á skjaldbökur sem tákn lang-lífis og talið er til dyggða að gefa dýrunum frelsi á degi Wesaks, sem er trúarlegur frídagur í búddatrú.  Þess vegna eru skjaldbökur stöðugt fluttar til hofsins til að gefa þeim frelsi síðar.  Gestir mega fóðra þær með grænmeti, sem selt er á staðnum.

Maður að nafni Beow Lean kom frá Kína síðla árs 1885 til að taka við stöðu ábóta í elzta kínverska klaustrinu á Penang, Kuan Yin Teng.  Hann fékk hugmyndina að Kek Lok Si hofinu, þegar hann sá að landslagið var svipað umhverfi Hof San klaustursins í Foochow í Kína, þar sem hann fæddist.  Hann fékk leyfi til að nota það klaustur til fyrirmyndar.  Beow var eignalaus maður eins og munkum ber að vera en með eldmóði sínum fékk hann fjársterka kaupmenn til að styrkja verkið.  Fyrstu 15 árin fóru í að ryðja skóg og sprengja grjót.  Aðalhofið, sem hæst rís er átthyrnt neðst eins og kín-versk hof, þakskreytingarnar eru tælenzkar og turnspíran er búrmönsk.  Í hilluröðum innandyra eru búddalíkneski úr marmara og gulli.

Penanghæð rís 821 m yfir sjávarmál, þar sem hæst ber.  Talsvert svalara er þar uppi en niðri í borginni og útsýnið er mjög gott.  Ferðin upp tekur hálfa klst með togbraut, en biðin eftir fari upp getur tekið langan tíma.  Fyrsta lest fer upp kl. 06:30 í Air Itam og síðan á hálftíma fresti til miðnættis.  Fargjald er M$ 3.00 fyrir fullorðna og M$ 1,50 fyrir börn.

Grasagarðurinn er 8 km frá Georgetown í fögrum dal, umkringdum frumskógi.  Þar eru grænar flatir, tilbúnir hólar, fjöldi trjá- og jurtategundum og hálfvilltir apar, sem vinsælt er að fóðra.  Sölumenn vilja selja ferðamönnum hnetur til að gefa þeim, en aparnir vilja þær ekki.  Þeir kjósa frekar ávexti.  Í litlum dýragarði má sjá dádýr músadádýr (mjög lítil), oran gutan, kengúrur o.fl.

Wat Chai Yamanalaram.  Stærsta tælenzka hofið á Penang.  Þar er þriðji stærsti liggjandi búdda í heiminum, 33 m langur og skreyttur gulllaufi.

Búrmanska hofið er handan götunnar, beint á móti hinu tælenzka.  Það er eina búrmanska hofið á Penang.  Auk íburðarmikilla útskurðarmynda eru þar tveir steinfílar við aðalhliðið.

Batuferringhi.  Frábærar strendur u.þ.b. hálftímaakstur í norður frá Georgetown.  þar er fjöldi mjög góðra alþjóðlegra hótela (Bayview Pacific Beach Resort var opnað 1. okt. 1990).

Malæískt þorp á Penang.  Teluk Bahang er u.þ.b. 24 km frá Georgetown á vesturströndinni.  Það er dæmigert malayískt múslimaþorp, þar sem býr rólegt, vingjarnlegt og snyrtilegt fólk, sem stundar fiskveiðar.  Mikið er veitt að næturlagi.  Snyrtimennskan á aðallega rætur í því að halda skordýrum og öðrum óæskilegum smádýrum í burtu.  Síðdegis er fjör í tuskunum, þegar bátarnir koma að landi og fiskurinn er boðinn upp með hávaða og látum eftir að eiginkonur fiskimannanna hafa valið sér góða bita.  Taka má myndir í þorpinu og börnin þiggja gjarnan smáaura fyrir.  Lífið er ákaflega einfalt og óstressað.  Húsin eru líka einföld að gerð, flest með bárujárnsþökum núorðið, því auðveldara er að gera þau en stráþökin.

Penangbrúin.  Heildarlengd 13,5 km, þar af 11,5 km yfir sjó.  Tollur á leið til Penang en ekki þaðan til meginlandsins.  Hún var opnuð 15. sept. 1985.  Suður-kóreanskt fyrirtæki byggði hana á þremur og hálfu ári í stað fimm ára, sem áætluð voru til verksins.  Við smíðina unnu 3000 verkamenn, þar af 1000 refsifangar frá S.-Kóreu.  Tuttugu manns fórust við smíðina og fjöldi manns hefur framið sjálfsmorð með því að stökkva fram af henni.  Á henni eru fjórar akreinar og hægt að fjölga þeim í sex.  Hæst er undir brúna miðja eru 225 m.  Hún er gerð til að bera a.m.k. 45 tonna farartæki á 4 öxlum.

Fuglagarðurinn er nálægt brúarendanum meginlandsmegin.