Þar sem Malakkasund mætir Indlandshafi eru 99 eyjar, 30 km frá ströndinni við Kuala Perlis.  P.L. er þeirra stærst, en á hinum stærstu búa u.þ.b. 20.000 manns.  Margar eyjanna eru með öllu óbyggðar og ósnortnar.  Helzta þorpið á P.L. er Kuah.  Helztu náttúrufyrirbærin eru: 

Sjöhyljafoss, litskrúðug klettabelti, frábærar strendur (ein með svörtum sandi), kóralrif og gjöful fiskimið milli kóralskerja og eyja.

P.L. er rómantísk eyja, þrungin þjóðsögum og ævintýrum.  Þjóðsagnaprinsessan Mahsuri var líflátin á P.L. vegna meints hórdómsbrots.  Áður en hún lét lífið lagði hún þau álög á eyjuna, að hagsæld skyldi skorta næstu 7 kynslóðir.  Þegar blóð hennar rann hvítt, þóttust menn vissir um, að hún hefði verið líflátin saklaus.  Nú virðast álögin orðin óvirk, því að reist hafa verið mörg lúxushótel (L. Country Club) og grózka er í ferðaþjónustunni.  Vegur með bundnu slitlagi liggur umhverfis alla eyjuna.

*Stöðuvatn vanfæru konunnar dregur að sér óbyrjur, sem trúa á þjóðsöguna um barnlausu konuna, sem varð ófrísk við að baða sig í því.

P.L. var áður fyrr aðsetur sjóræningja eins og svo margir aðrir staðir í þessum heimshluta.

Strendur eyjarinnar eru afbragðsgóðar og hægt er að finna afskekkta og rólega staði.  Á fjöru er hægt að ganga þurrum fótum frá Pantai Rhu-ströndinni út í litla eyju en þess verður að gæta, að grandinn hverfur á flóði.  Sjórinn er víða tær, þótt monsúnvindar gruggi hann talsvert víða, og gaman er að virða fyrir sér sjávarlífið, kóralla, fiska, krabba o.fl. í gegnum sundgleraugu við köfun eða sund.

Afþreying
1.  Fjallganga á Gunong Rayu, 758 m.
2.  Útreiðar.
3.  Siglingar (skútur, bátar, köfun, veiði).
4.  Golf, tennis, ballskák o.fl. innanhússleikir.
Skoðunarverðir staðir
Villidýragarðurinn, Sjöhyljafoss, Kuahflói, Hvítkrókódílavatn, Stöðuvatn vanfæru konunnar,

Svartaströnd, marmaranámurnar, heitu laugarnar, margra hæða hellir, gröf Mahsuris.

Sjöhyljafoss er 91 m hár með 7 stöllum.  Gaman er að renna sér niður fossana milli hylja, þó ekki niður efsta fossinn, sem er of brattur.

Heitu laugarnar eru sagðar hafa myndazt við heiftugar deilur milli tveggja helztu fjölskyldna eyjarinnar vegna mægða.  Fjölskylda biðilsins rændi þorp fjölskyldu stúlkunnar og átök hófust.  Þar var heitt í kolunum.