Pokhara (200 km vestan Kathmandu) kemur næst höfuðborginni að mikilvægi í ferðaþjónutunni.  Þangað er auðvelt að komast land- og loftleiðina.  Borgin er í 915 m hæð yfir sjó og því er hlýrra þar sumar og vetur en í Kathmandu.  Nafn borgarinnar er dregið af fjölda stöðuvatna í dalnum, sem hún er í (Pokhara = stöðuvatn).  Aðdráttarafl Pokhara liggur fremur í fögru umhverfi hennar en gömlum byggingum.  Annapurna-fjöllin gnæfa tígurleg í bakgrunninum auk Macchapucchare ('Sporðurinn'; 6994m).  Gönguferðir upp í þennan fjallasal byrja í Pokhara.

U.þ.b. miðleiðis milli Kathmandu og Pokhara er Gorkha (Gurkha), bústaður nepölsku konungsfjölskyldunnar.  Gestum er leyfður aðgangur að höllinni til að skoða hana, en Gorkhanath- og Kalika-musterin eru mun áhugaverðari.

Á ferð um Suðvestu-Nepal til *Chitwan-þjóðgarðsins (220 km frá Kathmandu) ætti ferðafólk staldra við í Daman (80 km frá Kathmandu, við Tribhuvan Raipath-þjóðveginn).  Þaðan er frábært **útsýni til norðurhluta Himalajafjalla.  Það er líka hægt að komast fljúgandi til Chitwan-þjóðgarðsins, sem er gríðarstórt svæði í Rapti-dalnum.  Þar er mikill regnskógur með ríku-legri fánu og flóru, óteljandi fuglategundir, nashyrningar, tígrar, hlébarðar og skriðdýr.  Það er vissulega hægt að fara í gönguferðir um þjóðgarðinn, en hótelin í honum og umhverfis hann bjóða gestum sínum ferðir á fílsbaki, í jeppum og á bátum.

Bharatpur er aðalbærinn í Rapti-dalnum og þaðan er gaman að fara á markaðinn í Narayangarh.  Það er hægt að komast í skoðunar- eða krókódíla-veiðiferðir á bátum á Narayani-ánni.

Lumbini, fæðingarstaður Buddha, er bær skammt frá litla þorpinu Bhairawa í Suður-Nepal.  Til sannindamerkis um fæðingu Buddha eru áletranir á súlu, sem Ashoka-keisarinn lét reisa í tilefni af pílagrímsferð árið 245 f.Kr.  Þar eru og yngri rústir klausturs og höggmynd af móður Buddha, Maya Devi.

Helambu er hérað norðan Kathmandu, þar sem serpar búa.  Eitt þekktasta serpaþorpið er Namche Bazaar (3440m).  Þangað er líka hægt að komast fljúgandi.  Frá þessu héraði er haldið í miserfiðar gönguferðir upp í fjöllin og þar er hægt að skoða mörg og margs konar klaustur, Gosainkunda-vatnið eða fara í dagsgöngu til Thyangboche-klaustursins.