Rostov-na-Donu er höfuðborg Rostovhéraðs í Suðvestur-Rússlandi.  Borgin er við ána Don, 50 km frá ósunum við Azovhaf.  Borgin var stofnuð árið 1749 sem landamærastöðin Temernika, þegar ármynnið var enn á valdi Tyrkja.  Siðar varð hún að líflegum verzlunarstað.  Á árunum 1761-63 var Dmitry-virkið byggt og byggðin þróaðist í kringum það í grennd við armeníska þorpið Nakhichevan-na-Donu.  Vegna góðra hafnarskilyrða og hentugrar legu til flutninga óx borgin og dafnaði, þegar Rússar innlimuðu Norður-Kákasussvæðið og Transkákasus á 19. öld.

Borgin gegnir enn þá sama hlutverki, því að siglingarleiðin um Don var stórbætt með opnun Volga-Don-skurðarins 1952.  Leiðinni út í Azovhaf er haldið opinni með stöðugri dælingu.  Borgin er líka miðstöð samgangna með járnbrautum, um þjóðvegi og um hana liggja gasleiðslur frá miðjum Evrópuhluta Rússlands til Kákasussvæðisins.

Samgönguhlutverkið og nálægar kolanámur í Donet leiddu til mikillar iðnvæðingar.  Borgin er stærsti framleiðandi landbúnaðarvéla í Rússlandi.  Auk þeirra eru framleiddar kúlu- og rúllulegur, raf- og hitunartæki, kaplar, prammar, vegavinnutæki og vélbúnaður til iðnaðar.  Þarna er skipasmíðastöð og járnbrautarverkstæði auk verksmiðja, sem framleiða neyzluvörur.  Háskóli borgarinnar var stofnaður árið 1917.  Ýmsar aðrar æðri menntastofnanir eru í borginni ásamt rannsóknarstofum.  Áætlaður íbúafjöldi árið 1991 var rúmlega 1 milljón.